पाकिस्तान क्रिकेट बोर्डका अध्यक्ष मोहसिन नकवीले फेब्रुअरी १५ मा भारतविरुद्ध हुने टी-२० विश्वकपको खेलमा पाकिस्तान सहभागी हुने वा नहुने भन्नेबारे आगामी २४ घण्टाभित्र निर्णय हुन सक्ने बताएको केही घण्टामै पाकिस्तान सरकारले एक्समार्फत भारत विरुद्धको खेल खेल्ने पुष्टि गरेको छ।
यसअघि नकवीले भनेका थिए, ‘हामीले आईसीसीसँग छलफल गरेका छौं। अहिले नै यसबारे कुनै टिप्पणी गर्नु उचित हुँदैन। आईसीसीको जवाफ आएपछि हामी निर्णय गर्नेछौं। आईसीसीको प्रतिक्रिया आएपछि हामी थप सल्लाहका लागि प्रधानमन्त्री (शहबाज शरीफ) कहा जानेछौं। भोलि वा पर्सिसम्ममा यसबारे औपचारिक घोषणा हुनेछ।’
उनले २४ घण्टाको समयसीमा भने पनि सरकारले भने आजै भारतविरुद्ध खेल्न अनुमति दिएको हो।
यसैबीच, बंगलादेश क्रिकेट बोर्डका अध्यक्ष अमिनुल इस्लामले आइतबार लाहोरमा नकवी र आईसीसीका सहअध्यक्ष इमरान ख्वाजासँगको भेटपछि पाकिस्तानलाई भारतविरुद्धको खेल खेल्न औपचारिक रूपमा अनुरोध गरेका छन्।
उनले भने, ‘यस समयमा बंगलादेशलाई सहयोग गर्न पाकिस्तानले देखाएको तत्परताबाट हामी निकै प्रभावित भएका छौं। हाम्रो यो भाइचारा सधैं कायम रहोस्।’
उनले थप अगाडि भने, ‘मेरो छोटो पाकिस्तान भ्रमण र हाम्रा बीच भएका छलफलका सकारात्मक परिणामहरूलाई ध्यानमा राख्दै, म समग्र क्रिकेट जगतको हितका लागि पाकिस्तानलाई फेब्रुअरी १५ मा भारतविरुद्धको खेल खेल्न अनुरोध गर्दछु।’
*अपडेट गरिएको
-1746009348.jpg)
