आइसिसी टी-२० विश्वकप २०२६ अन्तर्गत नेपाल रहेको समूह ‘सी’ को खेलमा वेस्ट इन्डिजले इंग्ल्यान्डलाई ३० रनले हराएको छ। मुम्बईको वानखेडे रंगशलामा भएको खेलमा वेस्ट इन्डिजले ब्याटिङ र बलिङ दुवैमा उत्कृष्ट प्रदर्शन गर्यो।
टस हारेर पहिले ब्याटिङ गरेको वेस्ट इन्डिजको सुरुवात निकै खराब गरेको थियो। सुरुवातमै ८ रनमा २ विकेट गुमे पनि शेरफेन रदरफोर्डको अर्धशतक र रोस्टन चेसको ३३ रनको मद्दतले टोलीले सम्मानजनक स्कोर बनायो।
शीत परेको कठिन परिस्थितिमा पनि वेस्ट इन्डिजका स्पिनरहरूले खेललाई आफ्नो नियन्त्रणमा राखे। गुडाकेश मोटीले ३ विकेट लिए भने रोस्टन चेस र अकिल होसेनले पनि कसिलो बलिङ गर्दै इंग्ल्यान्डका ब्याट्सम्यानहरूलाई क्रिजमा टिक्न दिएनन्। मोटी र चेसले मिलेर ८ ओभरमा ५ विकेट लिएपछि १९७ रनको लक्ष्य पछ्याएको इंग्ल्यान्ड १९ ओभरमा १६६ रनमै अलआउट भयो।
६७ रन बनाउँदा मात्र १ विकेट गुमाएको इंग्ल्यान्ड एक समय बलियो स्थितिमा थियो। फिल साल्टले पावरप्लेमा आक्रामक ब्याटिङ गरेका थिए। तर स्पिनरहरू आउनेबित्तिकै इंग्ल्यान्डका ब्याटर चल्न सक्नन्। साम करन ४३ रनमा अविजित रहे पनि उनले टोलीलाई जित दिलाउन सकेनन्।
नेपालविरुद्धको अघिल्लो खेलमा निकै रन खर्चिएका इंग्ल्यान्डका स्पिनर अदिल रसिदले यस खेलमा भने सानदार पुनरागमन गरे। उनले ४ ओभरमा कुनै चौका-छक्का नखाई मात्र १६ रन दिएर २ विकेट लिए। तर पनि इंग्ल्यान्डले वेस्ट इन्डिजका ब्याटरलाई रोक्न सकेन।
पछिल्ला १२ टी-२० खेलमध्ये ११ वटा जितेको इंग्ल्यान्डको अपराजित यात्रालाई वेस्ट इन्डिजले रोकिदिएको छ। यसअघि वेस्ट इन्डिजले स्कटल्यान्डलाई हराएकाले चार अंक बनाएको छ। यता पहिलो खेलमा नेपालमाथि जित निकालेको इंग्लिस टोलीको दुई अंक छ। यो समूहमा नेपाल र इटालीबीच बिहीबार सवा तीन बजे खेल हुँदैछ। दुवै टोली जितको खोजीमा हुनेछन्।
अब वेस्ट इन्डिज र नेपालबीच भने आइतबार प्रतिस्पर्धा हुनेछ।
-1746009348.jpg)
