आइसिसी टी-२० विश्वकप २०२६ मा इटालीले नेपाललाई १० विकेटले पराजित गर्दै विश्वकप इतिहासमा आफ्नो पहिलो जित निकालेको छ।
भारतको वानखेडे रंगशालामा बिहीबार भएको समूह ‘सी’ को यो खेलमा टस हारेको नेपाल १९.३ ओभरमा १२३ रनमा अलआउट हुन पुग्दा नै इटाली खेलमा हाबी देखिएको थियो। इटालीले यो लक्ष्य १२.४ ओभरमा कुनै विकेट नगुमाई पूरा गर्दै ऐतिहासिक जित निकाल्यो।
इटालीको इनिङ्समा मोस्का दाजुभाइ (एन्थोनी र जस्टिन मोस्का) ले प्रमुख भूमिका खेले। दुवैले अर्धशतक प्रहार गर्दै कुनै विकेट नगुमाई लक्ष्य पूरा गरे।
खेलपछिको पत्रकार सम्मेलनमा इटालीका प्रशिक्षक जोन डेभिसनले जितपछि खेलाडीको भावुकता व्यक्त गरे। उनले भने, ‘यो जितपछि खेलाडीका आँखामा आँसु थिए, विशेष गरी मोस्का दाजुभाइका। उनीहरूले कुनै विकेट नगुमाई लक्ष्य पूरा गर्दा यो धेरै महत्वपूर्ण थियो। यो जित इटाली क्रिकेटलाई विश्व नक्शामा ल्याउने छ। यो इटालीका धेरै पत्रिकामा फ्रन्ट पेज समाचार बन्नेछ र शायद विन्टर ओलिम्पिक्सलाई पनि पछाडि पार्नेछ।’
कप्तानीको भूमिका रहेका ह्यारी मानेन्टीले पनि यो जितलाई इटाली क्रिकेटको लागि टर्निङ प्वाइन्ट बताए। उनले भने, ‘यो जितपछि मैले फोनमा मेरी नोना (हजुरआमा) र बुबाको सन्देश पाएँ। यो इटालीको लागि प्रतिनिधित्व गर्नु विशेष छ। मोस्का दाजुभाइ रोएका थिए, जसले हामीलाई भावुक बनायो। इटाली क्रिकेटले विश्वमा आफ्नो छाप छोड्नेछ।’
मानेन्टीले इटालीका खेलाडीको संघर्ष उल्लेख गर्दै भने, ‘हाम्रा १५ मध्ये १२ खेलाडीले क्रिकेटबाहेक काम गर्नुपर्छ। क्रिशन कालुगामेजले पिज्जा बनाएर जीविका चलाउँछन् र आज म्यान अफ द म्याच बने। यो जितले इटालीमा क्रिकेटको विकासमा योगदान दिनेछ।’
प्रशिक्षक डेभिसनले अघि थपे, ‘हामीले स्कटल्यान्डविरुद्धको पहिलो खेलमा सबै कुरा गलत भयो, तर आज सबै कुरा सही भयो। यो हाम्रो बहादुरीको प्रतिबिम्ब हो। नेपालले इंग्ल्यान्डविरुद्ध राम्रो खेलेको थियो, तर आज हामीले फ्यानको भीड र अपेक्षालाई सामना गर्दै जित्यौं।’
इटालीले फिल्डिङमा पनि उत्कृष्ट प्रदर्शन थियो, जसले नेपाललाई दबाबमा राख्यो। मानेन्टीले भने, ‘हामीले फिल्डिङमा धेरै मेहनत गरेका थियौं र यो जित यसको फल हो।’
-1746009348.jpg)
