आइसिसी टी-२० विश्वकप २०२६ मा नेपालले आइतबार वेस्ट इन्डिजसँग आफ्नो तेस्रो खेल खेल्दैछ। यसअघिका दुई खेल इंग्ल्यान्ड र वेस्ट इन्डिजसँग पराजित भएको नेपालका लागि यो खेल महत्वपूर्ण छ।
यो खेलको विषयमा वेस्ट इन्डिजका देब्रे हाते स्पिनर अकिल हुसेनले नेपाललाई सम्मान गरेर खेल्ने बताएका छन्। गत सेप्टेम्बरमा नेपालसँग शारजाहमा वेस्ट इन्डिजले तीन खेलको टी-२० सिरिज खेल्दा हुसेनले नै कप्तानी गरेका थिए।
आइतबार मुम्बईको वानखेडेमा प्रतिस्पर्धा गर्नुअघि उनले आफूले पावरप्लेमा बलिङ गर्ने बताए।
‘म पावरप्लेमा बलिङ गर्छु, म बललाई स्पिन र स्विङ गराउँछु,’ अर्का स्पिनर गुणाकेश मोतीको भूमिका बारे थप भने, ‘मोती पावरप्ले बाहिर पुरानो बलका साथ बलिङ गर्छन्। उनी बायाँ हाते अर्थोडक्स र 'चाइनाम्यान' दुवै बलिङ गर्छन्। त्यसैले मलाई लाग्छ कि टी-२० क्रिकेटमा तपाईं के बलिङ गर्नुहुन्छ भन्ने भन्दा पनि यो कुन समयमा बलिङ गर्नुहुन्छ भन्ने कुराले महत्व राख्छ।’
उनले कुनै पनि टोलीलाई हल्का रुपमा नलिने पनि बताए। ‘तपाईंले प्रतियोगिताको सुरुवातदेखि नै देख्न सक्नुहुन्छ कि धेरै ठूला टोलीहरू समस्यामा परेका थिए। त्यसैले यो विश्वकपमा कसैलाई पनि हल्का रूपमा लिन सकिँदैन। हाम्रो तयारी र मानसिकता उस्तै रहनेछ र अन्तमा मुख्य कुरा भनेको योजनाको कार्यान्वयन हो। यो विश्वकप हो र यी टोलीहरू यहाँसम्म आइपुग्न जे गर्नुपर्ने थियो, त्यो गरेरै आएका हुन्। हाम्रो लागि यो कसैलाई हल्का रूपमा लिने कुरा होइन, बरु प्रतिद्वन्द्वी विरुद्ध अर्को क्रिकेट म्याच खेल्ने कुरा मात्र हो।’
उनले नेपाली टोलीबारे बोल्दै नेपालको तालमेल राम्रो भएको प्रतिक्रिया थिए। साथै उनले शारजाहमा वेस्ट इन्डिजलाई हराएको कुरा पनि सम्झिए । भने, ‘हामीलाई शारजाहमा हराएका थिए, तर त्यतिबेला हाम्रा धेरै सिनियर खेलाडीहरू त्यहाँ थिएनन्। हामीले पछिल्ला केही खेलहरूमा उनीहरूको क्षमता देख्यौं। उनीहरू निकै मिलेको टोली हो। त्यसैले खेलको दिनमा तपाईंले आफ्नो उत्कृष्ट क्रिकेट खेल्नै पर्छ।’
उनले जारी विश्वकपमा नेपालका लागि गुमाउनु पर्ने केही कुरा नभएको पनि प्रतिक्रिया दिए।
‘उनीहरूको लागि यो यहाँ आएर बाँकी विश्वलाई आफू के गर्न सक्छौं र प्रतिस्पर्धा गर्न सक्छौं भनेर देखाउने अवसर हो। हाम्रो लागि भने एउटै लक्ष्य र एउटै मिसन छ। विश्वकप जित्नका लागि तपाईंले हरेक टोलीलाई हराउनुपर्छ। यहाँ कुनै ठूलो वा सानो टोली हुँदैन। अन्त्यमा जसले खेलको दिन राम्रो क्रिकेट खेल्छ, उसैले जित्छ। हामी यसलाई नेपाल विरुद्धको खेलको रूपमा मात्र होइन, बरु हामीले जित्नै पर्ने अर्को विश्वकप म्याचको रूपमा लिनेछौं,’ उनले भने।
-1746009348.jpg)
