भारतको अहमदाबादमा आइतबार सम्पन्न अन्तर्राष्ट्रिय क्रिकेट परिषद (आइसिसी) को बोर्ड बैठकले क्रिकेटको सुशासन, महिला क्रिकेटको विकास र खेलमा नवीनता ल्याउने सम्बन्धमा महत्त्वपूर्ण निर्णयहरू गरेको छ।
मुख्य रूपमा खेलका नियमहरूमा परिवर्तन गर्ने निर्णय गरिएको छ।
गुलाबी बलको परीक्षण: टेस्ट म्याचमा कम प्रकाशका कारण खेल रोकिने समस्या समाधान गर्न, दुवै टोलीको सहमतिमा 'पिंक बल' (गुलाबी बल) प्रयोग गरी खेल जारी राख्ने परीक्षण गरिनेछ।
प्रकाश प्रविधिमा अनुसन्धान: खेल मैदानको प्रकाश व्यवस्था सुधार्न आइसिसीले मेरिलेबोन क्रिकेट क्लब (एमसिसी) सँग मिलेर नयाँ प्रविधिमा लगानी र अनुसन्धान गर्नेछ।
अवैध बलिङको जाँच: बलिङ एक्सन नियमविपरीत भए/नभएको जाँच गर्दा अब म्याच अफिसियलहरूले 'हक-आई'को डाटा प्रयोग गर्न पाउनेछन्।
प्रशिक्षकसँग परामर्श: खेलको दौरान हुने 'ड्रिंक्स ब्रेक' मा प्रशिक्षक वा उनले तोकेको व्यक्तिले मैदानमा गएर टोलीसँग सल्लाह गर्न पाउनेछन्।
टी-२० अन्तराल: टी-२० अन्तर्राष्ट्रिय खेलहरूमा दुई इनिङ्सको बीचमा १५ मिनेटको समय अनिवार्य गरिएको छ।
लेगसाइड वाइड: लेगसाइडतर्फ फालिने वाइड बल सम्बन्धी नियमलाई अब स्थायी रूपमा लागू गरिनेछ।
नयाँ नियम: १ अक्टोबर २०२६ देखि एमसिसीले क्रिकेटका नियमहरूमा गर्ने सबै परिवर्तनहरू पूर्ण रूपमा लागू हुनेछन्।
महिला क्रिकेट
च्याम्पियन्स ट्रफी २०२७: सन् २०२७ को महिला च्याम्पियन्स ट्रफी अब जुन-जुलाईको सट्टा फेब्रुअरी १४ देखि २८ सम्म आयोजना हुनेछ।
इमर्जिङ नेसन्स ट्रफी २०२६: सन् २०२६ मा १० टोली सहभागी हुने 'इमर्जिङ नेसन्स ट्रफी' सुरु गरिनेछ, जसमा ५ पूर्ण सदस्य र ५ एसोसिएट सदस्य राष्ट्रका टोली रहनेछन्।
टी-२० विश्वकप २०२८: पाकिस्तानले आयोजना गर्ने यस विश्वकपमा १२ टोली सहभागी हुनेछन्। भारतका खेलहरू भने पाकिस्तान बाहिर 'तटस्थ स्थान' मा खेलाइनेछ। यसका लागि १० टोली वरीयता र अघिल्लो विश्वकपको प्रदर्शनका आधारमा छनोट हुनेछन् भने बाँकी २ टोली विश्वव्यापी छनोटबाट आउनेछन्।
एसोसिएट
पुरुष टी-२० विश्वकपका लागि १६ टोली सहभागी हुने गरी 'ग्लोबल क्वालिफायर' (विश्वव्यापी छनोट) को संरचना बनाउन आइसिसीले तयारी सुरु गरेको छ।
सदस्यता र निलम्बन
क्रिकेट क्यानडा निलम्बन: सदस्यताको सर्तहरू पालना नगरेको भन्दै क्रिकेट क्यानडालाई तत्काल प्रभावबाट निलम्बन गरिएको छ। तर, क्यानडाका खेलाडीहरूको हितलाई ध्यानमा राख्दै उनीहरूले आइसिसीका प्रतियोगिताहरू खेल्न पाउनेछन्। क्यानडालाई दिइने बजेट पनि अब आइसिसीको प्रत्यक्ष निगरानीमा मात्र खर्च गर्न पाइनेछ।
बंगलादेश र श्रीलंका: बंगलादेशको क्रिकेट बोर्डको चुनाव र त्यहाँको अवस्था बुझ्न आइसिसीको टोली बंगलादेश जानेछ। त्यस्तै, श्रीलंकाको क्रिकेट विकासको अवस्था बुझ्न पनि आइसिसी प्रतिनिधिहरूले भ्रमण गरेका छन्।
फ्रेन्चाइज क्रिकेट
संसारभरि बढ्दै गएको विभिन्न टी-२० र टी-१० लिगहरूका कारण अन्तर्राष्ट्रिय क्रिकेटको तालिकामा असर पर्न थालेकोमा आइसिसीले चासो देखाएको छ। अन्तर्राष्ट्रिय खेल र यस्ता लिगहरूबीच सन्तुलन मिलाउन एउटा विशेष समिति गठन गरिएको छ।
आइसिसीका अध्यक्ष जय शाहका अनुसार यी निर्णयहरूले क्रिकेटलाई थप निष्पक्ष, प्रतिस्पर्धी र विश्वभर फैलाउन मद्दत गर्नेछ।
