आर्सनलका प्रशिक्षक मिकेल अर्टेटालाई कोरोना भाइरस लागेको छ।
कोरोना लागेको आशंका गर्दै गरिएको जाँचमा अर्टेटालाई कोरोना पोजेटिभ देखिएको हो।
प्रशिक्षकलाई कोरोना लागेपछि आर्सनल र ब्रिङ्टनबीचको खेल स्थगित गरिएको छ।
आर्सनलले प्रशिक्षण मैदान बन्द गरेको छ भने क्लबका स्टाफलाई सेल्फ आइसोलेसनमा राखेको छ।
इंग्ल्यान्डमा कोरोना संक्रमण बढिरहेपछि प्रिमियर लिगले आपतकालिन बैठक राखेको छ। बैठकले प्रिमियर लिगको खेल तालिकाको विषयमा निर्णय गर्नेछ।
'यो दु:खद हो,' ३७ वर्षीय स्पेनिस नागरिक अर्टेटाले भने, 'मैले गराएको जाँचपछि कमजोर महसुस भएको छ। काम गर्न हुने भएपछि म मैदान फर्कन्छु।'
आर्सनलले आफ्ना सबै खेलाडी र स्टाफलाई आइसोलेसनमा राख्ने जनाएको छ।
यता लेस्टर सिटीका तीन खेलाडी सेल्फ आइसोलेसनमा बसेका छन्।
कोरोनाकै कारण स्पेनिस क्लब रियल म्याड्रिड र म्यानचेस्टर सिटीबीचको च्याम्पियन्स लिगको खेल स्थगित भएको छ।
सिटीका डिफेन्डर बेन्जामिन मेन्डे पनि सेल्फ आइसोलेसनमा बसेका छन्।