स्पेनिस क्लब बार्सिलोनाका अध्यक्ष जोसेप मारिया बार्तोमेउले भिडियो एसिस्टेन्ड रेफ्री (भार) सधैं एउटै टिमको पक्षमा रहेको आरोप लगाएका छन्।
अध्यक्ष जोसेपले ला लिगाको उपाधि नजिक रहेको रियल म्याड्रिडतर्फ संकेत गर्दै यस्तो आरोप लगाएका हुन्।
आइतबार राति भएको खेलमा बार्सिलोनाले भिल्लारियललाई ४-१ गोलले पराजित गरेको थियो। जित हात पारे पनि बार्सिलोना अन्तिम चार खेल बाँकी रहदा शीर्ष स्थानको रियल म्याड्रिडभन्दा चार अंकले पछि छ।
बार्सिलोनाले भिल्लारियललाई हराएको केहि घन्टाअघि शीर्ष स्थानको रियलले एथ्लेटिक क्लबलाई १-० गोलले पराजित गरेको थियो। रियलका लागि सर्जियो रामोसले पेनाल्टीमार्फत गोल गरेको थिए। सो पेनाल्टी भारमार्फत प्रदान गरिएको थियो।
यद्यपी एथ्लेटिक क्लबले खेलको अन्त्यतिर भारको अपील गरे पनि प्रदान गरिएको थिएन।
'मैले रियल र एथ्लेटिकको खेल अन्तिमसम्म हेरेँ। मलाई नराम्रो लाग्यो। किनभने संसारको उत्कृष्ट लिगमा कोरोना भाइरसको पछिको भार निष्पक्ष छैन,' जोसेपले भने,'यसले केहि नतिजामा परिवर्तन ल्याएको छ र सधैं एउटै टिमको पक्षमा छ।'
कोरोनाभाइरसअघि २ अंकले अघि रहेको बार्सिलोना अहिले रियल म्याड्रिडसँग ४ अंकले पछि परेको स्थिति छ। लिगका अन्तिम चार खेल बाँकी रहदा रियलले तीन खेलमा जित हात पारे लिग जित्नेछ। बार्सिलोनाका लागि बाँकी रहेका चारै खेल जितेर मात्र पुग्दैन रियलले दुई खेलमा अंक गुमाउनु पर्छ।
