म्यानचेस्टर सिटीको प्रशिक्षकका रूपमा आफ्नो अन्तिम खेलमा पेप ग्वार्डिओला सुरुमा निकै शान्त देखिएका थिए। तर, अन्ततः उनी सम्हालिन सकेनन् र उनका आँखाबाट आँसु झरे।
खेलको ५९ औं मिनेटमा जब कप्तान बर्नार्डो सिल्भाको जर्सी नम्बर २० मैदान बाहिर निस्कने बोर्डमा देखियो, ग्वार्डिओलाले आफ्नो भावना रोक्न सकेनन्। दुवै टोलीका खेलाडीहरूले 'गार्ड अफ अनर' दिँदै गर्दा सिल्भा रोइरहेका थिए र उनलाई देखेपछि ग्वार्डिओलाको गालामा पनि आँसु सर्न थाल्यो।
प्रिमियर लिगका यी दुई महान् व्यक्तित्वहरूले मैदानको छेउमा एकअर्कालाई अगाँलो हाले। यो एउटा यस्तो अविष्मरणीय क्षण थियो जसको तस्बिर अब इतिहाद स्टेडियमको भित्तामा केभिन डि ब्रुयना, सर्जियो अग्युइरो र याया टुरे जस्ता दिग्गजहरूको सूचीमा सजाइनेछ।
ग्वार्डिओलाले आफ्नो सेतो टी-सर्टले आँसु पुछे र टोलीलाई अन्तिम जित दिलाउन प्रयास गरे। यद्यपि, एस्टन भिल्लासँगको त्यो खेलमा सिटी पराजित भयो, तर खेल सकिने सिट्टी बज्नेबित्तिकै त्यो हारको कुनै अर्थ रहेन। सबैतिर भावना र आँसु मात्र थियो।
५५ वर्षीय ग्वार्डिओलाले आफ्नो भावना व्यक्त गर्दै भने, ‘यो अध्याय सधैं रहनेछ। बर्नार्डो आज खेलअघि नै भावुक थिए। यदि रुन मन लाग्छ भने रोऊ, हाँस्न मन लाग्छ भने हाँस। भावनाहरू व्यक्त गर्नुपर्छ। म आफैं त रुन्नँ, तर जब अरू रोएको देख्छु, तब मलाई पनि आँसु आउँछ।’
खेल सुरु हुनुअघि नै स्टेडियमबाहिर ग्वार्डिओलाको तस्बिर अंकित झण्डा र स्कार्फहरू किन्ने फ्यानहरूको ठूलो भिड थियो। सयौं समर्थकहरूले आफ्नो प्रिय प्रशिक्षकलाई अन्तिम पटक स्टेडियम पसेको हेर्न लाइन लागेर पर्खिरहेका थिए।
उनको १० वर्षे कार्यकालमा सिटीले ६ पटक प्रिमियर लिग, एक पटक च्याम्पियन्स लिग, तीन पटक एफए कप र पाँच पटक काराबाओ कप जित्यो। सिटीको इतिहासमा यस्तो सफलता पहिले कहिल्यै मिलेको थिएन।
स्टेडियमको एउटा स्ट्यान्डमा ठूलो ब्यानर टाँगिएको थियो, जसमा लेखिएको थियो— 'पेपसँगको १० वर्ष – खेल बदल्ने, इतिहास रच्ने, सधैंका लागि सिटी।'
उनको सम्मानमा स्टेडियमको एउटा स्ट्यान्डको नाम नै 'पेप ग्वार्डिओला स्ट्यान्ड' राखिएको छ। बिदाइ भाषण दिँदा उनको स्वर कामिरहेको थियो। उनले भने, ‘धेरै सम्झनाहरू छन्, उपाधि बिर्सनुस् तर ती यादहरू सधैं रहनेछन्। यदि ममा ऊर्जा हुन्थ्यो भने म यहीँ बस्ने थिएँ, तर अब नयाँ व्यक्तिले यो काम गर्नुपर्छ।’
ग्वार्डिओलाले म्यानचेस्टर सिटीमा ५९३ खेलमध्ये ४१६ खेल जिते, जुन ७०.२ प्रतिशतको जितको दर हो। इङ्ल्यान्डमा २० भन्दा बढी खेलमा प्रशिक्षण सम्हाल्नेहरूमध्ये उनको औसत अंक (२.२८ प्रति खेल) सबैभन्दा बढी छ। उनी प्रिमियर लिगको एकै सिजनमा १०० अंक जोड्ने एक मात्र प्रशिक्षक हुन्।
अब उनको ठाउँमा इन्जो मारेस्का आउने चर्चा छ। मारेस्कालाई पेपको सल्लाह छ— ‘उनी जे हुन्, त्यही बन्नुपर्छ। आफ्नो शैलीमा काम गर्नुपर्छ।’
यो सिजन ग्वार्डिओला मात्र होइन, कप्तान बर्नार्डो सिल्भा र डिफेन्डर जोन स्टोन्सले पनि क्लब छाड्दैछन्। सिल्भाले सिटीमा ४६० खेल खेले, जुन ग्वार्डिओलाको प्रशिक्षणमा कुनै पनि खेलाडीले खेलेको सबैभन्दा धेरै खेल हो। सिल्भाले भावुक हुँदै भने, ‘मैले यहाँ पाएको जस्तो माया सायद जीवनमा फेरि कहिल्यै पाउने छैन। यो क्लब सधैं मेरो परिवार रहनेछ।’
यसका साथै पूर्व कप्तान इल्काय गुन्डोगान र गोलकिपर एडरसन पनि आफ्नो सम्मान ग्रहण गर्न स्टेडियम आएका थिए। यो साँच्चै इतिहाद स्टेडियममा एउटा महान् युगको अन्त्य थियो, जसलाई ग्वार्डिओला, खेलाडी र समर्थकहरूले सधैं सम्झिरहनेछन्।
