सन् २०२६ को विश्वकप सुरु हुन केही हप्ता मात्र बाँकी रहँदा अर्जेन्टिनाका कप्तान लिओनल मेसीको चोटलाई लिएर ठूलो चिन्ता पैदा भएको छ।
अमेरिकामा इन्टर मायमी र फिलाडेल्फिया युनियनबीच भएको १० गोलको रोमाञ्चक खेलमा मेसी आफैले मैदानबाहिर निस्कन संकेत गरेपछि फुटबल फ्यानहरूमा डर पैदा भएको हो।
आइतबार राति भएको खेलको ७३औँ मिनेटमा मेसी अचानक मैदानबाट सिधै ड्रेसिङ रुम (टनेल) तिर लागे। फ्रि-किक प्रहार गरेलगत्तै उनले आफ्नो देब्रे तिघ्राको माथिल्लो भाग समातेका थिए र आफूलाई गाह्रो भएको संकेत प्रशिक्षकलाई दिएका थिए। यद्यपि, उनी कसैको सहारा बिना आफैँ हिँडेर मैदानबाट बाहिरिएका थिए।
अर्जेन्टिनाले आउँदो जुन १६ मा अल्जेरिया विरुद्ध खेल्दै आफ्नो विश्वकप यात्रा सुरु गर्दैछ। ३८ वर्षको उमेरमा मेसीलाई हुने सानो मांसपेशीको समस्याले पनि अर्जेन्टिनी टोली र उनका करोडौँ फ्यानहरूलाई चिन्तित बनाएको छ।
मेसी मैदानबाट बाहिरिएपछि धेरैले उनी गम्भीर घाइते भएको आशंका गरेका थिए। तर, इन्टर मायमीका मुख्य प्रशिक्षक गुइलेर्मो होयोसले ती आशंकाहरूलाई शान्त पार्ने प्रयास गरेका छन्। उनले मेसी घाइते भएको भन्दा पनि धेरै थकित भएको बताएका छन्।
प्रशिक्षक होयोसले भने, ‘अहिलेसम्म हामीसँग कुनै मेडिकल रिपोर्ट त आएको छैन, तर उनी धेरै थकित देखिएका थिए। मैदान पनि अलि गाह्रो (हिलो वा भारी) थियो। त्यसैले कुनै जोखिम नलिने सोचेर उनलाई आराम दिइएको हो।’
मेसीको चोटको खबरले ओझेलमा पारे पनि यो खेल अमेरिकी फुटबल इतिहासकै सबैभन्दा रोमाञ्चक मध्येको एक थियो। खेलको पहिलो हाफमै कीर्तिमानी ८ गोल भए। फिलाडेल्फियाले सुरुमा २-० को अग्रता लिएको थियो, तर मेसीको पासमा जर्मन बर्टेरामेले गोल गर्दै मायमीलाई खेलमा फर्काए।
पहिलो हाफ ४-४ को बराबरीमा सकिएको थियो। दोस्रो हाफमा भारी वर्षाका कारण खेलको गति केही सुस्त भए पनि लुइस सुवारेजले ह्याट्रिक पूरा गरे र रोड्रिगो डे पलले अर्को गोल थपे। अन्त्यमा इन्टर मायमी ६-४ को विशाल अन्तरले विजयी भयो।
अब अमेरिकी लिग विश्वकपका लागि केही समय रोकिनेछ। अर्जेन्टिनाले अहिलेसम्म विश्वकपका लागि आफ्नो अन्तिम टोली घोषणा गरिसकेको छैन। मेसी अझै पनि अर्जेन्टिनाका लागि सबैभन्दा महत्त्वपूर्ण खेलाडी हुन्। अहिले अर्जेन्टिनाका प्रशिक्षक लियोनेल स्कालोनी र मेडिकल टोली मेसीको स्वास्थ्य रिपोर्टको प्रतीक्षामा छन् ताकि उनी विश्वकपका लागि पूर्ण रूपमा फिट हुन सकून्।
हाल इन्टर मायमी आफ्नो समूहको दोस्रो स्थानमा रहेको छ। अब सबैको ध्यान मेसीको मेडिकल रिपोर्टमा छ, जसले उनी विश्वकप खेल्न सक्छन् कि सक्दैनन् भन्ने कुराको टुङ्गो लगाउनेछ।
