नेपाल भलिबल संघले त्रिभुवन आर्मीका क्लबका ३ खेलाडीलाई कारबाही गरेको छ।
सातौं प्रधानमन्त्री कप एनभिए महिला तथा पुरुष राष्ट्रिय क्लब लिगका दौरान अनुसाशनहीन क्रियाकलापमा संलग्न भएको भन्दै भलबिल संघले आर्मीका धनबहादुर भट्ट, राजेन्द्र विष्ट र धनपती कुँवरलाई प्रतिबन्ध लगाएको हो।
स्पाइकर भट्टलाई ६ महिना प्रतिबन्ध लगाउदा विष्ट र कुँवरलाई ३-३ महिनाका लागि राष्ट्रिय तथा अन्तर्राष्ट्रिय खेलमा खेल्न प्रतिबन्ध लगाइएको भलिबल संघका महासचिव रोशन श्रेष्ठले जानकारी दिए।
प्रतियोगिताअन्तर्गत गत असार २५ गते गण्डकी प्रदेशसँगको खेलका दौरान आर्मीका स्पाइकर भट्टले दर्शकलाई प्यारापिटमै गएर कुटेका थिए।
चेकआउट हुँदा आर्मीलाई अंक दिएको भन्दै गण्डकीका खेलाडीले असन्तुष्टि जनाएका थिए। त्यहिँ क्रममा दर्शकदिर्घाबाट हुँटिङ हुँदै अपशब्द बोलिएको सुनिएको थियो। लगत्तै कोर्टमा बोतल प्रहार भएपछि आर्मीका खेलाडी उत्तेजित भएका थिए।।
यस्तै घटनामा संलग्न आर्मीका अर्का खेलाडी दुर्गा खड्कालाई सचेत गराइएको छ।
घटनामा संलग्न रहेको भन्दै आर्मी तथा राष्ट्रिय टिमका कप्तान रहेका हरिहजुर थापालाई राष्ट्रिय टिमको कप्तानीबाट बर्खास्त गरिएको छ।
महासचिव श्रेष्ठका अनुसार हरिहजुरले घटनालाई साम्य पार्नुको सट्टा बढाएको भन्दै कप्तान हुन योग्य हुन नसक्ने ठहर गरिएको छ।
घटना भएपछि नेपाल भलिबल संघले ५ सदस्यीय छानविन समिति गठन गरेको थियो। जसमा महासचिव श्रेष्ठ संयोजक थिए।
श्रेष्ठका अनुसार छानविन समितिले गरेको सिफारिसको आधारमा नेपाल भलिबल संघको कार्यसमितिले खेलाडीलाई कारबाही गर्ने निर्णय शनिबार राति गरेको हो।
महासचिव श्रेष्ठले प्रत्यक्ष प्रसारण भएर संसारभरबाट हेरिएको खेलमा खेलाडी उत्तेजित हुँदै दर्शक कुट्ने घटना राम्रो नभएको बताउँदै खेलाडीलाई कारबाहीको दायरामा ल्याएको बताए।
