नेपाल भलिबल संघको व्यवस्थापन तथा सहाना प्रधान प्रतिष्ठानको आयोजनामा प्रथम सहाना प्रधान स्मृति पुरुष तथा महिला भलिबल प्रतियोगिता असार ९ गतेदेखि हुने भएको छ।
सोका लागि प्रतिष्ठान र भलिबल संघबीच बुधबार सम्झौता भएको छ । प्रतिष्ठानकी अध्यक्ष रामकुमारी झाक्री र भलिबल संघका अध्यक्ष जितेन्द्रबहादुर चन्दले सम्झौता पत्रमा हस्ताक्षर गरे । सम्झौता अनुसार भलिबल संघले प्रतियोगिताको व्यवस्थापन गर्ने छ भने प्रतिष्ठानले आर्थिक पक्षमा सहयोग गर्ने छ ।
प्रतियोगितामा पुरुष/महिलामा सात प्रदेशबाट समान ७–७ टिम सहभागी हुने छन् । त्यसका लागि सातै प्रदेश भलिबल संघलाई टिम निर्माण गरी सहभागी गराउन आग्रह गर्ने अध्यक्ष चन्दले बताए । पुरुष/महिला दुवैमा सहभागीलाई २ समूहमा विभाजन गरी लिग कम नकआउट आधार खेल खेलाइने छ ।
पुरुष/महिला दुवैमा विजेताले ३ लाख, उपविजेताले २ लाख र तेश्रो हुनेले १ लाख नगद पुरस्कार प्राप्त गर्ने छन् । सर्वोत्कृष्ट खेलाडीलाई २५/२५ हजार नगद पुरस्कार प्रदान गरिने छ । विधागत उत्कृष्टले समान १०–१० हजार नगद पुरस्कार पाउने छन् ।
अध्यक्ष चन्दले कुनैपनि खेलको विकास गर्न ग्रासरुट प्रतियोगिता महत्वपूर्ण हुने बताउदै प्रतिष्ठानको सहयोगका लागि आभार प्रकट गरे । उनले प्रतियोगितालाई संघको वार्षिक क्यालेन्डरमा समावेश गर्ने बताउदै प्रतियोगिताले निरन्तरता पाउने विश्वास व्यक्त गरे ।
प्रतिष्ठानकी अध्यक्ष झाक्रीले उमेरसमूहको यो प्रतियोगितालाई वार्षिक क्यालेन्डरमा समावेश गरेकोमा संघलाई धन्यवाद दिदै नेपाली राजनीतिकी अग्रज स्व. सहानाको योगदानको सम्मानमा प्रतियोगिता आयोजना गर्न लागेको बताइन् ।
प्रतियोगिता सञ्चालन गर्न करिब ८० लाख रुपैयाँ खर्च हुने बताइएको छ । साताव्यापी प्रतियोगिताका खेलहरु त्रिपुरेश्वरस्थित राष्ट्रिय खेलकुद परिषद्को कभर्डहलमा खेलाइने छ ।
