रणवीर सिंह र अक्षय खन्ना अभिनीत फिल्म 'धुरन्धर' बक्स अफिसमा सफल प्रदर्शनपछि डिजिटल रिलिज भएको छ।
ओटिटी प्लेटफर्म नेटफ्लिक्समा शुक्रबार हिन्दीसहित तमिल र तुलुगु संस्करणमा समेत फिल्म रिलिज गरिएको हो। तर यसको ओटिटी संस्करणमा गरिएको केही कटौती र संवाद म्युटका कारण दर्शकहरू निराश बनेका छन्।
नेटफ्लिक्समा स्ट्रिमिङ भएपछि धेरैले फिल्मको करिब १० मिनेटको सामाग्री हटाइएको, केही संवादहरू म्युट गरिएको र केही हटाइएको पाएका छन्। यसले कथाको मूल प्रभाव र फिल्मको अनुभवमा असर पुर्याएको दर्शकहरूले बताएको हिन्तुस्तान टाइम्सले लेखेको छ।
सामाजिक सञ्जालमा दर्शकहरूले नेटफ्लिक्सलाई आलोचना गर्दै सोधेका छन्- 'ए' सर्टिफिकेट पाएको फिल्ममा यस्तो सम्पादन किन गरिएको?
धेरैले भनेका छन्– 'यदि फिल्म पूर्ण अनुभव देखाउन पाउँथ्यो भने नेटफ्लिक्सले यसलाई अनकट संस्करणमा राख्नुपर्थ्यो।'
कटौती र म्युटले मुख्य पात्रका भाव र कथाको मर्म झनै कमजोर भएको दर्शकहरूले बताएका छन्।
केही दर्शकले भनेका छन्, 'यदि सबै संवाद म्युट गरिएको छ भने फिल्म हेर्नुको अर्थ के? नेटफ्लिक्सले ए सर्टिफिकेट दिएको भए पनि गाली र कडा संवादहरू हटाउनु सही भएन।'
आदित्य धर निर्देशित 'धुरन्धर' एक्सन-थ्रिलर फिल्म हो। सिनेमा हलमा यसले दर्शक र समीक्षक दुवैको प्रशंसा पाएको थियो। यसले विश्वव्यापी रूपमा १३ सय करोड भारूभन्दा माथिको कमाइ गरेको छ। नेपालमा समेत फिल्मले १० करोड रूपैयाँमाथिको कमाइ गरेको छ।
डिसेम्बर ५ मा रिलिज 'धुरन्धर' मा रणवीर र अक्षयसहित संजय दत्त, अर्जुन रामपाल, आर माधवनलगायत कलाकारहरूको समेत अभिनय छ।
-1746009348.jpg)
