भारतीय अभिनेता शाहिद कपूर र अभिनेत्री तृप्ती डिमरी अभिनीत फिल्म 'ओ रोमियो' को व्यापारमा प्रदर्शनको दोस्रो उल्लेखनीय वृद्धि भएको छ।
शनिबार भ्यालेन्टाइन डेको दिन फिल्मले भारतमा १२ करोड भारूभन्दा बढी कमाएको छ।
'ओ रोमियो' ले प्रदर्शनको पहिलो दिन शुक्रबार ८ करोड ५० लाख भारू नेट कमाइ गरेको थियो। शनिबार फिल्मले १२ करोड २५ लाख भारू नेट कमाइ गरेको सैकनिल्क डट कमले जनाएको छ। जुन पहिलो दिनको तुलनामा लगभग ४५ प्रतिशतले वृद्धि हो।
योसँगै प्रदर्शनको दुई दिनमा भारतमा फिल्मको नेट कमाइ २० करोड ७५ लाख भारू पुगेको छ।
प्रेम सप्ताहको अवसर पारेर प्रदर्शनमा आएको यस फिल्मले विशेषगरी युवा दर्शकलाई आकर्षित गरेको विश्लेषण गरिएको छ। साजिद नाडियाडवालाद्वारा निर्मित फिल्म विशाल भारद्वाजको निर्देशनमा बनेको हो।
फिल्ममा शाहिद र तृप्तीसहित अविनाश तिवारी, फरिदा जलाल, नाना पाटेकर, तमन्ना भाटिया, दिशा पटानी, अरुणा इरानी, हुसेन दलाल, राहुल देशपाण्डे, विक्रान्त मेसीलगायत कलाकारहरूको अभिनय छ।
'ओ रोमियो' नेपालका सिनेमा हलमा पनि प्रदर्शन भइरहेको छ।
-1746009348.jpg)
