केही वर्ष अघिसम्म नेपाली फिल्ममा द्वन्द्व निर्देशकका रूपमा ख्याति कमाएका थिए चन्द्र पन्तले। यति बेला भने उनको परिचय फेरिँदैछ।
लामो समय अरूका फिल्ममा द्वन्द्व निर्देशन गरेका उनी पछिल्लो समय आफ्नो निर्देशनमा एकपछि अर्को फिल्म निर्माण गरिरहेका छन्।
चन्द्रले 'ह्रस्व दीर्घ' बाट नेपाली फिल्म निर्देशनमा डेब्यू गरेका थिए। त्यसपछि 'आबाट आमा' निर्देशन गरे। पारिवारिक कथामा बनेको यो फिल्मले साढे १३ करोड रूपैयाँभन्दा बढीको व्यापार गर्दै ठूलो सफलता हासिल गर्यो।
यति बेला यही फिल्मको दोस्रो शृंखला 'आबाट आमा २' प्रदर्शन तयारीमा छ। शुक्रबारदेखि प्रदर्शन तयारीमा रहेको यो फिल्ममा चन्द्र लेखक, निर्माता र निर्देशक तीनवटै भूमिकामा छन्।
उनका अनुसार 'आबाट आमा २' अघिल्लो फिल्मको कथाको निरन्तरता भने होइन। नाम एउटै भए पनि यसमा पूर्ण रूपमा नयाँ कथा प्रस्तुत गरिएको छ।
'पहिलो भागसँग यसको नामबाहेक कुनै सम्बन्ध छैन। यो पूर्ण रूपमा नयाँ कथा हो। पहिलोभन्दा धेरै ठूलो क्यानभासमा फिल्म बनाएका छौं,' कुराकानीमा चन्द्रले भने, 'यो हरेक मध्यमवर्गीय परिवारले आफ्नै कथा महसुस गर्ने फिल्म हो।'
अघिल्लो फिल्मको सफलताले उत्साहित उनी यस पटक पनि दर्शकको माया पाउनेमा पूर्ण आशावादी छन्। दसैंमा अन्य ठूला फिल्मसँग प्रतिस्पर्धा हुने भए पनि उनी आफ्नो प्रतिस्पर्धा अरूसँग नभएको बताउँछन्।
'मेरो प्रतिस्पर्धा अरू कसैसँग छैन। आफ्नै अघिल्लो फिल्मसँग हो। आबाट आमाले जति ब्यापार गरेको थियो, त्योभन्दा राम्रो गर्ने चुनौती छ,' उनी भन्छन्।
यति बेला निर्माता र निर्देशकका रूपमा सफलता पाइरहेका चन्द्रको फिल्मी यात्रा भने फाइटरका रूपमा सुरू भएको थियो।
त्यो सुरूआती फिल्म थियो, सुरेशदर्पण पोखरेल निर्देशित 'निशाना'।
करिब तीन वर्ष फाइटरका रूपमा काम गरेपछि उनी स्टन्टम्यान, सहायक द्वन्द्व निर्देशक हुँदै द्वन्द्व निर्देशक बने।
द्वन्द्व निर्देशकका रूपमा उनको सुरूआती फिल्म 'रावण' हो। छविराज ओझाको निर्माणमा बनेको यस फिल्मपछि उनले निरन्तर नेपाली फिल्ममा द्वन्द्व निर्देशन गरे।
उनले आफ्नो करिअरमा करिब ६०–७० वटा नेपाली फिल्ममा द्वन्द्व निर्देशन गरेको बताउँछन्।
'हमेशा', 'किस्मत २', 'हवल्दार सुन्तली', 'लज्जा', 'लोफर', 'ड्रिम्स', 'कृ' र 'क्याप्टेन' लगायत फिल्ममा उनले द्वन्द्व निर्देशकका रूपमा काम गरेका थिए। विशेषगरी निर्माता छविराज ओझा र अभिनेता भुवन केसीका फिल्ममा उनले लामो समय काम गरे।
'मैले भुवन दाइका धेरै फिल्ममा द्वन्द्व निर्देशन गरेँ। छवि बाले पनि रावणपछि बनाउनुभएका लगभग सबै फिल्ममा काम गरेँ,' पन्त सम्झिन्छन्।
नेपाली फिल्ममा द्वन्द्व निर्देशकका रूपमा व्यस्त रहेकै बेला उनले भोजपुरी फिल्ममा पनि काम गरे। करिब एक दर्जन भोजपुरी फिल्ममा द्वन्द्व निर्देशन गरेको बताउँछन्।
द्वन्द्व निर्देशनमै व्यस्त रहेका उनलाई फिल्म निर्देशक बन्ने सोच भने थिएन। तर भोजपुरी फिल्म 'निरहुआ चलल लन्डन' निर्देशन गर्ने प्रस्ताव आएपछि उनको यात्राले नयाँ मोड लियो।
'मलाई निर्देशक बन्छु भन्ने कहिल्यै लागेको थिएन। द्वन्द्व निर्देशनमै एकदमै व्यस्त थिएँ। सुरूमा भोजपुरी फिल्म निर्देशन गर्दिनँ पनि भनेको थिएँ,' उनी सुनाउँछन्, 'तर राम्रो बजेट, लन्डनमा छायांकन गर्ने योजना र निरहुआजस्ता त्यसबेलाका चर्चित सुपरस्टार फिल्ममा हुने भनेपछि निर्देशन गर्न तयार भएँ।'
उनका अनुसार 'निरहुआ चलल लन्डन' त्यति बेलाको महँगो भोजपुरी फिल्ममध्ये एक थियो। भारतबाहिर छायांकन गरिएको पहिलो भोजपुरी फिल्मसमेत यही भएको उनको दाबी छ।
पहिलो निर्देशकीय फिल्म नै ब्लकबस्टर भएपछि भोजपुरी फिल्म उद्योगमा उनको माग बढ्यो।
चन्द्र भन्छन्, 'पहिलो फिल्म नै ब्लकबस्टर भयो। त्यसपछि लन्डनमा फिल्म छायांकन गर्ने क्रम निकै बढ्यो। मलाई त एकै पटक थुप्रै फिल्म निर्देशनको प्रस्तावसमेत आएको थियो।'
त्यसपछि उनले भोजपुरीमा थप केही फिल्म निर्देशन गरे। अनि ह्रस्व दीर्घबाट नेपाली फिल्ममा निर्देशकका रूपमा पाइला चाले।
निर्माण पक्षले आफूले चाहेको कलाकार र प्राविधिक टोली उपलब्ध गराउने प्रतिबद्धता जनाएपछि उनी यसमा काम गर्न तयार भएका थिए।
'नयाँ निर्देशकका लागि आफूले चाहेका कलाकार र प्राविधिक राखेर काम गर्न पाउनु ठूलो अवसर थियो। उहाँहरूले बजेटमा पनि कुनै कन्जुस्याइँ गर्नुभएन,' चन्द्र भन्छन्।
ह्रस्व दीर्घमा नेपाली कलाकारसँगै भारतीय कलाकार ब्रह्मानन्दम, सुनिल वर्मा, अली र कबीर दुहान सिंह लगायतको अभिनय थियो। प्राविधिक टोलीमा समेत भारतीय फिल्म उद्योगमा काम गरेका अनुभवी व्यक्तिहरू थिए। यसले नेपालमा ठीकठाक व्यापार गर्यो।
ह्रस्व दीर्घपछि चन्द्रले पारिवारिक कथामा आधारित फिल्म 'आबाट आमा' निर्देशन गरे। यो फिल्मको योजना उनले पहिल्यै बनाएका थिए।
सुरूमा छविराज ओझासँग मिलेर फिल्म बनाउने तयारी थियो। तर बीचमा ह्रस्व दीर्घ निर्माण भएपछि उक्त योजना पछाडि सर्यो।
अभिनेता पल शाहलाई सुरूमा प्रेमकथा र एक्सनप्रधान फिल्मका लागि अनुबन्ध गरेका चन्द्रले पछि आमाको कथा सुनाएका थिए। कथा सुनेर पल भावुक भएपछि उनीहरू यही फिल्ममा अगाडि बढेको उनले बताए।
'यो मैले समाजमा देखेका र भोगेका वास्तविक घटनाबाट तयार पारेको कथा हो,' चन्द्रले भने।
फिल्मले राम्रो व्यापार गरेपछि चन्द्रको निर्देशकीय करिअरले थप गति लियो।
रोचक कुरा के छ भने सुरूमा 'आबाट आमा' को दोस्रो शृंखला बनाउने योजना थिएन। पल शाहले आफ्नो फिल्म दसैंमा प्रदर्शन भएको अनुभव लिन चाहेको बताएपछि दसैंमा रिलिज गर्ने योजनासहित यसको निर्माण गरिएको चन्द्रले बताए।
लामो समय द्वन्द्व निर्देशन गरेर पहिचान बनाएका चन्द्रले ह्रस्व दीर्घ र आबाट आमा हुँदै आबाट आमा २ सम्म आइपुग्दा एक्सनभन्दा पारिवारिक संवेदनालाई प्राथमिकता दिएका छन्।
तर आफ्नो व्यक्तिगत रोजाइ अझै एक्सन फिल्म नै रहेको उनी बताउँछन्।
'मलाई सबभन्दा मन पर्ने जनरा एक्सन नै हो। म हलमा होस् वा नेटफ्लिक्समा, एक्सन फिल्म नै बढी हेर्छु,' उनले भने, 'तर दर्शकले कस्तो कथा मन पराउनुहुन्छ र समाज कुन दिशामा गइरहेको छ भन्ने कुरा पनि हेर्नुपर्छ।'
अब भने उनी अरूका फिल्ममा द्वन्द्व निर्देशकका रूपमा काम गर्नेभन्दा आफ्नै फिल्म निर्माण र निर्देशनमा केन्द्रित हुने योजनामा छन्।
आफ्ना फिल्ममा नयाँ पुस्ताका द्वन्द्व निर्देशकलाई अवसर दिइरहेको पनि उनी बताउँछन्।
भविष्यमा एक्सन फिल्म निर्देशन गर्ने उनको चाहना भने कायमै छ। तर त्यसका लागि गतिलो कथा र बलियो भावनात्मक पक्ष आवश्यक रहेको उनको बुझाइ छ।
'एक्सन भनेको बिनाकारण मारकाट गर्नु मात्रै होइन। पुरानै शैलीको बदलाको कथा बनाएर हुँदैन,' चन्द्र भन्छन्, 'राम्रो कथा, बलियो इमोसन र तर्कसंगत एक्सन भएको विषय पाएँ भने पक्कै एक्सन फिल्म बनाउँछु।'
.JPG)
