काठमाडौंको दरबारमार्गस्थित दरबार रोधी क्लब तीन दिनसम्म लोकसंगीतको रौनकमा झुम्यो।
१८ औं वार्षिकोत्सवको अवसरमा आयोजित सांगीतिक उत्सवमा वरिष्ठ गायक प्रेमराजा महतदेखि विश्व दोङसम्मका चर्चित कलाकारले प्रस्तुति दिँदै दर्शकलाई मनोरञ्जन प्रदान गरे। साथै, क्लबले दृष्टिविहीन तथा संघर्षरत कलाकारप्रति सहयोग गर्दै सामाजिक उत्तरदायित्वको उदाहरण पनि प्रस्तुत गर्यो।
२९ जेठदेखि सुरू भएको सांगीतिक उत्सवमा प्रेमराजा महतको ‘माया भेटियो बन्दीपुरैमा’, राजु परियारको ‘मिर्मिरेको घाम’, श्याम रानाको ‘रेलै सलल’ र दीपिका बयम्बुको ‘मायालाई के दिउँ म बैना’ जस्ता लोकप्रिय गीतले दर्शकलाई झुमाएका थिए। कृष्ण कँडेलले लाइभ दोहोरी प्रस्तुत गर्दै माहोललाई थप रौनक थपेका थिए।
कार्यक्रमको अवसरमा दरबार रोधी क्लबले दृष्टिविहीन तथा संघर्षरत कलाकारहरूको सहयोगका लागि ५० हजार रूपैयाँ प्रदान गरेको छ। क्लबका अध्यक्ष श्रवणकुमार कुँवरले सामाजिक उत्तरदायित्वलाई निरन्तरता दिँदै आगामी वर्षहरूमा पनि वार्षिकोत्सवबाट प्राप्त आम्दानीको एक हिस्सा यस्ता कलाकारहरूको सहयोगमा खर्च गर्ने प्रतिबद्धता व्यक्त गरे।
वार्षिकोत्सवको दोस्रो दिन गायिका प्रीति आले र गायक कुलेन्द्र विश्वकर्माले दर्शकलाई आफ्ना गीतमार्फत मनोरञ्जन दिएका थिए। प्रीति आलेले ‘बामरी बामरी’ प्रस्तुत गर्दा दर्शकले साथ दिएका थिए भने कुलेन्द्र विश्वकर्माले ‘सालको पातको टपरी’ गाएर माहोल तताएका थिए। अन्तिम दिन गायक विश्व दोङको प्रस्तुति मुख्य आकर्षण बनेको थियो। उनले प्रस्तुत गरेको चर्चित तामाङ सेलो ‘माया भन्दा ठूलो जात होइन’ ले दर्शकको विशेष ध्यान खिचेको थियो।
दरबारमार्गस्थित मायालु कम्प्लेक्समा आयोजित कार्यक्रममा वरिष्ठ गायक तथा सर्जक प्रेमराजा महत प्रमुख अतिथि थिए। कार्यक्रममा राष्ट्रिय लोक तथा दोहोरी गीत प्रतिष्ठान नेपालकी अध्यक्ष रीता थापा विशिष्ट अतिथि थिइन्। साथै नेपाल लोक दोहोरी व्यवसायी संघका अध्यक्ष विनोद श्रेष्ठ, राष्ट्रिय लोक दोहोरी व्यवसायी संघका अध्यक्ष दीपसागर थापा, मनोरञ्जन व्यवसायी संघका अध्यक्ष आशिष खड्का, रात्रिकालीन व्यवसायी प्रतिष्ठानकी अध्यक्ष उमा श्रेष्ठलगायत विभिन्न संघसंस्थाका प्रतिनिधिहरूको उपस्थिति रहेको थियो। अतिथि कलाकारहरूलाई परम्परागत नौमती बाजासहित स्वागत गरिएको कार्यक्रममा केक काटेर वार्षिकोत्सव मनाइएको थियो। कार्यक्रमको सञ्चालन कृष्ण आँसुले गरेका थिए।
नेपाली लोकगीत–संगीतको संरक्षण, संवद्र्धन तथा नयाँ प्रतिभालाई मञ्च प्रदान गर्ने उद्देश्यसहित स्थापना भएको दरबार रोधी क्लबले १८ वर्षको यात्रामा थुप्रै कलाकारलाई व्यावसायिक अवसर प्रदान गरेको छ।
यस वर्षको वार्षिकोत्सवले मनोरञ्जनसँगै कलाकारप्रतिको सामाजिक उत्तरदायित्व पनि सँगसँगै अघि बढाउन सकिने सन्देश दिएको आयोजकले जनाएको छ।
