गैरआवासीय नेपाली संघ (एनआरएनए) का महासचिव डा. हेमराज शर्माले आगामी कार्यकालका लागि उपाध्यक्ष पदमा उम्मेदवारी दिने भएका छन्।
गैरआवासीय नेपाली संघको महासचिवपछि आफूले सुरू गरेका रूपान्तरणका प्रयासलाई संस्थागत गर्नुपर्ने आवश्यकता महशुस भएकाले आफू चुनावी मैदानमा आउनु परेको भौतिकशास्त्री समेत रहेका डा. शर्माले सेतोपाटीलाई बताए।
‘संस्थाको महासचिवको जिम्मेवारी लिएपछि सबैलाई केही अनुभूति हुने गरि काम गर्ने छु भन्ने प्रतिबद्धतासहित आएको थिएँ त्यसको परिणाम सबैतिर दिन थालेको छ। संस्थामा सुरूआत भएका अजेण्डाहरूलाई थप निष्कर्षमा पुर्याउन पर्ने जिम्मेवारी पनि आफ्नै हो भन्ने लागेर चुनावी मैदानमा जाने निर्णय गरेको छु,’ उनले भने, ‘मैले संस्थामा केही परिवर्तन गर्छु भनेर सार्वजनिक गरेका प्रतिबद्धता पुरा हुने अवस्थामा छन् ती अजेण्डाहरूको स्थायीत्व र संस्थागत गर्न चुनौती छन्। आगामी कार्यकालमा अहिले शुरूआत गरिएका कामहरूलाई पूर्ण रूपमा संस्था गर्नेमा लाग्ने छु।’
डा. शर्माले महासचिवको बागडोर समालेपछि स्मार्ट एनआरएनए अन्तर्गत विश्वभर छरिएका ८० भन्दा बढी देशका पञ्जिकृत सदस्यलाई केन्द्रीय प्रणालीमा जोड्ने, अनलाइन भोटिङ, निःशुल्क प्रतिनिधि दर्ताजस्ता महत्पूर्ण निर्णयहरु विषेश महाधिवेशनमार्फत विधान संशोधन गरेर संघलाई रूपान्तरण बाटोमा अघि बढाएका छन्।
कुशल प्रशासकसमेत रहेका शर्माले काठमाडौंस्थित संघको सचिवालयलाई चुस्त राख्न र पुर्नरसंरचना गर्न महत्वपूर्ण भूमिका निर्वाह गरेका थिए ।
डा. शर्माले विश्वव्यापी कोरोना महामारीमा विदेशमा अलपत्र परेका नेपालीको उद्धारको लागि संयुक्त राष्ट्रसंघ समक्ष पुगेर आवाज बुलन्द गर्दै गैरआवासीय नेपाली संघलाई पहिलो पटक अन्तराष्ट्रिय दातृ निकायसंग सहकार्यको शुरूआत गरेका थिए।
डा. शर्मा बेलायतस्थित लिभरपुल विश्वविद्यालयमा भौतिकशास्त्रका प्राध्यापक हुन्। १५ जनाभन्दा बढी विद्यार्थीको विद्यावारिधि ‘सुपरभाइज’ गरिसकेका उनले आफ्नो नेतृत्वमा गत वर्ष काठमाडौंमा अन्तर्राष्ट्रिय विज्ञ सम्मेलन गरेका थिए।
डा. शर्मा संघको परिमार्जित नयाँ विधान २००७ को खाका र नियमावलीका मस्यौदाकार समेत हुन्।
बाग्लुङको अमलाचौरमा जन्मिएका शर्मा एनआरएनभित्रका सकृय प्राज्ञिक व्यक्तित्वको रूपमा चिनिन्छन्। उनले भौतिकशास्त्रमा त्रिभुवन विश्वविद्यालयबाट गोल्डमेडल समेत हासिल गरेका छन् ।
उनले सन् १९९७ मा जापानको रिक्यो विश्वविद्यालयमा मास्टर्स कोर्स गरेका थिए भने १९९८ मा इटालीबाट थप मास्टर्स डिग्री हासिल गरे। उनले सन् २००२ मा फ्री युनिभर्सिटी बर्लिनबाट ‘फिजिक्स’ मै पिएचडी गरेका हुन् ।
सन् २००५ मा एनआरएन जापानको महासचिवको जिम्मेवारी सम्हालेका शर्माले सन् २००७ मा बेलायत गएसँगै त्यहांको आइसीसी सदस्यमा मनोनित भएका थिए । उनी एनआरएनए विधान समितिका संयोजक समेत थिए।
संघका संस्थापक नेताहरु तथा सबै पूर्वअध्यक्षहरुसंग निकट रहेर काम गरेको अनुभव बटुलेका शर्माले पूर्व अध्यक्ष जीवा लामिछानेको कार्यकालमा प्रवक्ताको जिम्मेवारी सम्हालेका थिए।
