गुड फ्राइडे सिनेमा
अहिले भारतीय फिल्म 'धुरन्धर' को चर्चा छ। सुपरहिट भएको यो फिल्मसँगै सबभन्दा धेरै चर्चा अभिनेता अक्षय खन्नाको अभिनयको भइरहेको छ।
धुरन्धरमा उनको भूमिका धेरै बोल्ने खालको छैन। तर उनको भाव, हेराइ, हाउभाउ र संयमित अभिनयले चरित्रलाई गहिरो बनाएको भन्दै उनको प्रशंसा भइरहेको छ।
धेरै दर्शक र समीक्षकले धुरन्धरलाई कथाभन्दा पनि अक्षय खन्नाको अभिनयका कारण सम्झनलायक फिल्म भनेका छन्।
अक्षय खन्ना सधैं बलिउडका टिपिकल हिरोभन्दा फरक अभिनेता मानिँदै आएका छन्।
'ताल, दिल चाहता है, कम्पनी, हंगामा, ब्ल्याक फ्राइडे, रेस' जस्ता फिल्ममा उनले भिन्न भिन्न चरित्र निर्वाह गरेर आफूलाई सक्षम कलाकारका रूपमा स्थापित गरे।
ठूलो संवाद र नाटकीय अभिनयभन्दा स्वाभाविक र भित्री भावमा आधारित अभिनय नै उनको पहिचान बन्यो। त्यसैले उनी स्टारडमभन्दा अभिनयको गहिराइ खोज्ने कलाकारका रूपमा चिनिए। पछिल्लो समय 'दृश्यम-२' र 'छावा' मा पनि उनको अभिनयको प्रशंसा भएको थियो।
बीचमा अक्षय केही समय बलिउडबाट हराएजस्तै भएका थिए। त्यसैले धुरन्धरलाई धेरैले उनको बलियो पुनरागमनका रूपमा हेरेका छन्। यो फिल्मले अक्षय खन्ना अझै पनि दमदार अभिनेता हुन् भन्ने कुरा फेरि एक पटक प्रमाणित गरेको छ र उनको करिअरले नयाँ मोड लिएको चर्चा भइरहेको छ।
उनको अभिनयको चर्चा चलिरहँदा अहिले धेरैले उनको पुरानो तर सशक्त काम 'गान्धी, माई फादर' सम्झिन थालेका छन्।
अभिनयका हिसाबले अक्षयको करिअरमा यो फिल्मलाई विशेष मानिन्छ।
यसमा अक्षयले महात्मा गान्धीका छोरा हरिलाल गान्धीको पीडादायी र द्वन्द्वपूर्ण जीवनलाई निकै संवेदनशील ढंगले प्रस्तुत गरेका छन्। बुबासँगको टकराव, अस्वीकारको पीडा र अन्ततः जीवनको ओरालो यात्रालाई उनले अत्यन्तै संयमका साथ उतारेका छन्।
फिल्मले राम्रो व्यापार गरेन, तर समीक्षकहरूले मनपराए। अक्षयले यसमा गरेको अभिनयलाई करिअरकै उत्कृष्टमध्ये एक मानियो।
फिल्मको कथाले गान्धी र हरिलालबीच दुरी कसरी बढ्दै जान्छ भन्ने निकै संवेदनशील रूपमा देखाउँछ।
हरिलालको सपना विदेश गएर पढ्ने हुन्छ। तर गान्धी छोरा भारतमै बसून् र आन्दोलनमा लागून् भन्ने चाहन्छन्। यही मतभेद उनीहरूबीचको टकरावको बिउ बन्छ।
पढाइ, काम र जीवनका हरेक प्रयासमा असफल हुँदै जाँदा हरिलाल आर्थिक संकट, पारिवारिक विछोड र व्यक्तिगत पीडामा डुब्दै जान्छन्।
उनकी श्रीमती गुलाबको मृत्यु हुन्छ। उनी मदिरामा डुब्छन्। धर्म परिवर्तन गर्छन्।
यस्ता घटनाले उनको जीवन झन् ओरालो लाग्छ।
अन्ततः बाबु र छोराबीचको सम्बन्ध यति चिसिन्छ, गान्धीको हत्या हुँदा हरिलाल लगभग एक्लो र अपरिचित अवस्थामै अन्त्येष्टिमा सहभागी हुन्छन्। केही समयपछि उनी पनि गुमनाम अवस्थामै जीवनबाट बिदा हुन्छन्।
फिल्ममा अक्षय खन्नाले हरिलाल गान्धीको पीडा, असन्तोष र भित्री द्वन्द्व अत्यन्तै शान्त र गहिरो अभिनय मार्फत उतारेका छन्। उनको यही अभिनयका कारण फिल्मले अन्तर्राष्ट्रिय मिडियाको पनि ध्यान खिच्यो।
'द गार्डियन' ले यसलाई साहसी र आँखा खोल्ने फिल्म भनेको थियो।
राष्ट्रिय चलचित्र पुरस्कार, जी–सिने अवार्ड्स, एसिया प्यासिफिक स्क्रिन अवार्ड्स पाएको गान्धी, माई फादरको भारतीय समीक्षकहरूले पनि खुब प्रशंसा गरेका थिए।
आज गुड फ्राइडे सिनेमामा हामीले यही फिल्म सिफारिस गरेका छौं।
-1746009348.jpg)
