करेन्ट लागेर मृत्यु भएका तनहुँको शुक्लागण्डकी नगरपालिका–३ दुरुङचङका २७ वर्षीय चित्रबहादुर रानाको परिवारलाई १६ लाख रुपैयाँ क्षतिपूर्ति दिने सहमति भएको छ।
ग्रामीण पूर्वाधार तथा वातावरण विकास मञ्च र पीडित परिवारबीच आज भएको छलफलपछि पीडित परिवारलाई १६ लाख रुपैयाँ क्षतिपूर्ति दिने सहमति भएको हो। बिहीबार रानाको करेन्ट लागेर मृत्यु भएको थियो।
विद्युत् व्यवस्थापन समितिको लापरबाहीका कारण करेन्ट लागेको भन्दै पीडित परिवारले शव बुझेका थिएनन्।
पीडितले २५ लाख रुपैयाँ क्षतिपूर्तिको माग गरेका थिए।
चित्रबहादुर आफ्नै कोठामा हातमा मोबाइल लिइरहेको अवस्थामा अचेत भेटिएका थिए।
स्थानीयबासीका अनुसार उनको दाहिने हात, मोबाइल र चार्जरसमेत जलेको थियो। उपचारका लागि बेलचौतारास्थित जिपी कोइराला राष्ट्रिय श्वासप्रश्वास उपचार केन्द्र ल्याइएकामा चिकित्सकले मृत घोषणा गरेका थिए।
क्षतिपूर्ति दिने सहमति भएसँगै शव दमौली अस्पतालमा परीक्षण गरी बेलचौतारामा लगेर अन्त्येष्टि गरिएको छ।
समितिले किरिया खर्चबापत एक लाख रुपैयाँ आइतबार उपलब्ध गराउने र बाँकी १५ लाख रुपैयाँ पुस २५ गतेभित्र उपलब्ध गराउने सहमति गरेको छ।
करेन्ट लागेर सोही ठाउँका अन्य दुई जना घाइते भएका थिए। घाइतेको पनि उपचार खर्च समितिले बेहोर्ने भएको छ।
विद्युत् व्यवस्थापन समितिको लापरबाहीले ट्रान्सफर्मरमा फ्युज नराखीकन विद्युत् प्रवाह गर्दा घटना भएको पीडित परिवारको आरोप छ।
