अफगानिस्तानमा आफ्नो आधार क्षेत्रमा पाकिस्तानले हमला गरेपछि तालिबान सरकार वार्ताका लागि तयार भएको छ।
पाकिस्तानले शुक्रबार अफगानिस्तानको काबुल, कान्दाहार लगायत विभिन्न स्थानमा हमला गरेको थियो। पाकिस्तानले हमला गरेका स्थानहरू तालिबानी लडाकूको आधार क्षेत्र मानिन्छ। सैन्य अखडा मात्रै होइन हतियार भण्डारलाई पनि पाकिस्तानले लक्ष्य गरेर हवाई हमला गरेको थियो।
शुक्रबार बेलुकी अफगानिस्तानको तालिबान सरकारका अधिकारीले आफूहरू वार्ताका लागि तयार भएको भनेर पाकिस्तानी अधिकारीलाई टेलिफोन गरेको भनेर अन्तर्राष्ट्रिय समाचार संस्था रोयटर्सले जनाएको छ।
उसका अनुसार तालिबान सरकारका विदेशमन्त्री आमिर खान मुक्ताकीले पाकिस्तानका सहायक विदेशमन्त्रीलाई टेलिफोन गरी कुटनीतिक पहलबाट समस्या समाधान गर्न तयार रहेको बताएका थिए।
यसमा पाकिस्तानले के जबाफ दिएको भन्ने खुलेको छैन।
शुक्रबार बिहान पाकिस्तानका राज्यमन्त्री ख्वाजा आशिफले पाकिस्तान अफगानी तालिबानविरूद्ध खुला युद्ध हुने बताएका थिए।
यद्यपि उनको त्यो घोषणा राजनीतिक मात्रै रहेको भनेर अन्तर्राष्ट्रिय सञ्चारमाध्यमहरूले जनाएका छन्।
बिहीबार अफगानिस्तानले पाकिस्तानको सीमा क्षेत्रमा हमला गरेपछि शुक्रबार बिहानीपख त्यसको जबाफ भन्दै पाकिस्तानले काबुल लगायतका ठाउँहरूमा हमला गरेको थियो।
बिहीबार रातिदेखि एक अर्कामाथि भएको हमलामा मारिनेको संख्या यकिन छैन। दुवै देशले फरक-फरक दाबी गरेका छन्।
दुवै पक्षले एकअर्कालाई ठूलो क्षति पुर्याएको दाबी गरेका छन्। पाकिस्तानले आफ्ना आक्रमणमा २७४ तालिबान अधिकारी तथा लडाकु मारिएको जनाएको छ भने अफगानिस्तानले ५५ पाकिस्तानी सैनिक मारिएको दाबी गरेको छ। यी दाबीहरू स्वतन्त्र रूपमा पुष्टि हुन सकेका छैनन्। पाकिस्तानले आफ्ना १२ सैनिक मारिएको स्वीकार गरेको छ भने अफगानिस्तानले १३ तालिबान लडाकु गुमाएको जनाएको छ।
काबुलमा दुई स्थानबाट बाक्लो कालो धुवाँ उठेको र ठूलो आगलागी भएको दृश्य रायटर्सले प्रमाणीकरण गरेको भिडियोमा देखिएको छ। प्रत्यक्षदर्शीहरूले ठूलो विस्फोटको आवाज र जेट विमानको गर्जनसँगै एम्बुलेन्सका साइरन सुनिएको बताएका छन्।
काबुलका ट्याक्सी चालक तामिमले हतियार भण्डारण गरिएको गोदाममा आक्रमण भएको र त्यसपछि लगातार विस्फोट भइरहेकाले सर्वसाधारण आतंकित भएको बताए।
‘विमान आयो, दुई बम खसाल्यो र फर्कियो। त्यसपछि लगातार विस्फोटको आवाज आयो,’ उनले रोयटर्ससँग भने।
पाकिस्तानका सुरक्षा स्रोतहरूका अनुसार तालिबानका सैन्य कार्यालय र चौकीहरूमा हवाई–देखि–भूमि क्षेप्यास्त्र प्रहार गरिएको थियो।
पछिल्ला दिनमा सीमाक्षेत्रमा दुवै पक्षबाट आक्रमण भएपछि लामो समयदेखिको अविश्वास झन् चर्किएको हो।
पाकिस्तानले अफगानिस्तानले ‘तेहरीक–ए–तालिबान पाकिस्तान’ (टीटीपी) का लडाकुहरूलाई आश्रय दिएको आरोप लगाउँदै आएको छ। अफगानिस्तानले भने यस्तो आरोप अस्वीकार गर्दै पाकिस्तानले आफ्नै सुरक्षा कमजोरी ढाकछोप गर्न खोजेको दाबी गर्दै आएको छ।
यसबीच, संयुक्त राष्ट्रसंघका महासचिव एन्टोनियो गुटेरेसले बढ्दो हिंसाप्रति गहिरो चिन्ता व्यक्त गर्दै तत्काल युद्धविराम र कूटनीतिक समाधानको आह्वान गरेका छन्।
संयुक्त राष्ट्रसंघका प्रवक्ता स्टेफान दुजारिकका अनुसार जारी द्वन्द्वले सर्वसाधारणमा गम्भीर असर पारिरहेको छ। अफगानिस्तानमा हाल करिब २ करोड २० लाख मानिस मानवीय सहायतामा निर्भर छन् र द्वन्द्व चर्किए संख्या बढ्न सक्ने चेतावनी दिइएको छ।
अमेरिकाले पाकिस्तानको 'आत्मरक्षाको अधिकार' भन्दै समर्थन जनाएको छ।
अमेरिकी विदेश मन्त्रालयका प्रवक्ताले तालिबानले आतंकवादविरुद्धका प्रतिबद्धता पूरा गर्न असफल भएको आरोप लगाए। युरोपेली संघकी विदेश नीति प्रमुख काजा कालासले पनि तनाव कम गरी संवादमा फर्कन आग्रह गरेकी छन्।
-1746009348.jpg)
