वाणिज्य बैंकहरुमा संकलित निक्षेप ३५ खर्ब नाघेको छ।
असोज २ गतेसम्म २७ वाणिज्य बैंकहरुमा ३५ खर्ब १६ अर्ब निक्षेप संकलन भएको नेपाल बैंकर्स एसोसिएसनले जनाएको छ।
पछिल्लो हप्ता मात्रै निक्षेप २१ अर्ब बढेको छ। भदौ २६ गते ३४ खर्ब ९५ अर्ब रुपैयाँ निक्षेप संकलन भएको थियो।
असोज २ गतेसम्म कर्जा प्रवाह २९ खर्ब १३ अर्ब भएको छ। पछिल्लो एक हप्ता मात्रै ९ अर्बले कर्जा बढेको एसोसिएसनको तथ्यांक छ। भदौ २६ गतेसम्म २९ खर्ब ४ अर्ब कर्जा प्रवाह भएको थियो।
उपत्यका लगायत देशका विभिन्न जिल्लामा निषेधाज्ञा खुलेसँगै कर्जा प्रवाहमा केही सुधारको संकेत देखिएको माछापुच्छ्रे बैंकका सिइओ सन्तोष कोइरालाले जानकारी दिए।
| Deposit and Lending of Commercial Banks (in Billions) |
| Month | Date | Deposit | Lending |
| LCY | FCY | Total | LCY | FCY | Total |
| Aswin 2075 | 31/06/2075 | 2436 | 87 | 2523 | 2183 | 62 | 2246 |
| Poush 2075 | 30/09/2075 | 2557 | 99 | 2656 | 2302 | 66 | 2368 |
| Chaitra 2075 | 29/12/2075 | 2584 | 119 | 2703 | 2349 | 71 | 2420 |
| Ashad 2076 | 31/03/2076 | 2764 | 114 | 2878 | 2422 | 76 | 2498 |
| Ashwin 2076 | 30/06/2076 | 2851 | 122 | 2973 | 2547 | 82 | 2629 |
| Poush 2076 | 29/09/2076 | 2931 | 129 | 3060 | 2650 | 81 | 2731 |
| Chaitra 2076 | 30/12/2076 | 3052 | 137 | 3189 | 2748 | 98 | 2845 |
| Ashad 2077 | 31/03/2077 | 3362 | 125 | 3487 | 2806 | 97 | 2903 |
| Shrawan 2077 | 09/04/2077 | 3344 | 118 | 3462 | 2772 | 95 | 2867 |
| 16/04/2077 | 3371 | 115 | 3487 | 2590 | 93 | 2866 |
| 23/04/2077 | 3360 | 113 | 3476 | 2779 | 92 | 2871 |
| 30/04/2077 | 3367 | 112 | 3479 | 2787 | 91 | 2878 |
| Bhadra 2077 | 05/05/2077 | 3368 | 112 | 3480 | 2794 | 92 | 2886 |
| 12/05/2077 | 3377 | 109 | 3485 | 2801 | 91 | 2892 |
| 19/05/2077 | 3383 | 108 | 3491 | 2807 | 90 | 2897 |
| 26/05/2077 | 3388 | 107 | 3495 | 2815 | 90 | 2904 |
| Ashwin 2077 | 02/06/2077 | 3403 | 113 | 3516 | 2824 | 89 | 2913 |
‘निषेधाज्ञा खुलेपछि अब कर्जा प्रवाह बढ्ने अनुमान गरेका छौँ, अहिले एलसी पनि खुल्न थालेको छ’ उनले भने। पछिल्लो समय बैंकहरुमा लगानीयोग्य रकम पनि पर्याप्त रहेको उनले बताए।
बैंकहरुमा करिब २ खर्बको हाराहारीमा लगानीयोग्य रकम छ।
लगानीयोग्य रकम थुप्रिएपछि कतिपय बैंकले घर र गाडी खरिदका लागि सस्तो ब्याजदरको अफर समेत ल्याएका छन्। घर र गाडी अन्य क्षेत्रका तुलनामा बैंकहरुले सुरक्षित ठान्ने भएकाले यस्तो कर्जाका लागि अफर ल्याउने गरेका छन्।
‘अन्य क्षेत्रमा भन्दा घर र गाडीमा भएको ऋण डिफल्ट कम छ, अर्कोतर्फ यसमा ऋण दिनका लागि प्रक्रिया पनि सहज छ’ कोइरालाले भने।
त्यस्तै हाल बैंकहरुले पुनर्कर्जाका लागि आवेदन लिइरहेका छन्।
कतिपय व्यवसायी पुनर्कर्जा पाउने आशले पनि बैंकबाट ऋण लिनेतिर नलागेको हुन सक्ने बैंकर बताउँछन्। पुनर्कर्जाको ब्याजदर सस्तो हुने भएकाले यसतर्फ व्यवसायीको आकर्षण देखिएको छ।
कतिपय बैंकमा पुर्नकर्जाको लागि मागभन्दा धेरै आवेदन परेको छ। ‘माछापुच्छ्रे बैंकले जति पुनर्कर्जा दिन सक्छ, त्योभन्दा ३ गुणा बढी आवेदन परेको छ, असोज १५ गतेसम्म हामीले आवेदन लिन्छौँ’ कोइरालाले भने।
पुर्नकर्जा नपाएकाले पुनः बैंकबाटै ऋण लिनुपर्ने भएकाले त्यसपछि कर्जा प्रवाहमा उल्लेख्य वृद्धि हुने बैंकहरुले जनाएका छन्।
यस पटक विभिन्न व्यवसायमा कोरोनाको असर परेकाले सोलाई समेत मध्यनजर गर्दै राष्ट्र बैंकले पुनर्कर्जाका लागि कार्यविधि तयार गरेको छ। सोही कार्यविधिका आधारमा रहेर बैंकहरुले पुर्नकर्जाका लागि आवेदन लिइरहेका छन्।
बैंकहरुमा प्राप्त आवेदन राष्ट्र बैंकबाट स्वीकृति भएपछि मात्रै आवेदकले ऋण प्राप्त गर्न सक्छन्। यस पटक साना तथा मझौला उद्योग व्यवसायलाई समेत यस्तो कर्जा प्रदान हुनेछ।
