कात्तिकमा निक्षेपको ब्याजदर नबढाउने बैंकरहरूबीच सहमति भएको छ। अहिले निक्षेपको ब्याज बढ्दा बढ्ने लागत माघमा मात्रै समायोजन गर्न पाइने भन्दै बैंकहरुले निक्षेपको ब्याजदर नबढाउने मौखिक सहमति गरेका छन्। तरपनि, शुक्रबार मात्रै बैंकरहरुले ब्याजदरको विषयमा टुंगो लगाउने भएका छन्।
गत असोजमा बैंकहरुले ६ महिनापछि निक्षेपको ब्याजदर बढाएका थिए। हाल निक्षेपको अधिकतम ब्याजदर १२.१३३ प्रतिशत र बचतमा ७.१३३ प्रतिशतसम्म कायम गरेका छन्। रेमिटेन्स खाता जस्ता केही विशेष निक्षेपमा भने बैंकहरूले १५ प्रतिशतसम्म ब्याजदर दिएका छन्।
राष्ट्र बैंकको निर्देशनअनुसार बैंकहरूले मासिक रूपमा निक्षेपको ब्याजदर बढाउदा अघिल्लो महिनाको लागि दिइएको औसत ब्याजदरमा १० प्रतिशत विन्दुले मात्रै बढाउन पाउने व्यवस्था छ।
कात्तिकपछि भने नयाँ र पुराना दुवै खाले कर्जाको ब्याजदर बढ्ने भएको छ। एक त्रैमास (तीन/तीन महिना) को औसत आधार दर गणानापछि मात्रै पुराना कर्जामा ब्याजदर बढाउन पाउने व्यवस्था छ।
नयाँ कर्जामा भने यो व्यवस्था लागू हुँदैन। बैंकहरूको असोजको आधार दर प्रकाशित हुन बाँकी छ। बैंकहरूको भदौमै आधार दर १० प्रतिशत माथि पुगिसकेको छ।
नेपाल बैंकर्स एसोसिएसनले सार्वजनिक गरेको तथ्यांकअनुसार असोज १४ देखि २१ गतेबीच आठ अर्बले निक्षेप घटेको छ। असोज २१ सम्ममा वाणिज्य बैंकमा ४५ खर्ब ११ अर्ब निक्षेप छ।
यो बीचमा कर्जा लगानी भने पाँच अर्बले घटेर ४१ खर्ब ९३ अर्बमा सीमित भएको छ। बैंकहरूको कर्जा निक्षेप अनुपात ८७.२५ प्रतिशत छ।
