नेपाल राष्ट्र बैंकले सेयर धितो कर्जामा राखेको जोखिम भार पुनरावलोकन गर्ने भएको छ।
आइतबार आर्थिक वर्ष २०८०/८१ को लागि मौद्रिक नीति सार्वजनिक गरेको राष्ट्र बैंकले यस्तो उल्लेख गरेको हो।
सेयर धितो कर्जामा विद्यमान जोखिम भार घटाउने संकेत देखिएको छ।
सेयर धितो कर्जामा जोखिम भार घटाएपछि बैंकहरू सेयर कर्जा प्रवाह गर्न उत्साहित हुनेछन्। जोखिम भार घट्ने भएपछि सेयर धितो कर्जा पनि सस्तो हुनेछ।
यही कारण आइतबार सेयर बजारमा उत्साह थपिएको छ। आइतबार नेप्से परिसूचक ६३.२४ अंकले बढेको छ।
यस दिन नेप्से २.९२ प्रतिशतले घटेर २२२७.१६ बिन्दुमा बन्द भएको छ।
आइतबार नेप्से परिसूचकसँगै कारोबार रकम पनि अघिल्लो दिनको तुलनामा बढेको छ।
गत कारोबार दिन ३ अर्ब ५ करोड २४ लाख १० हजार ६५९ रुपैयाँको सेयर कारोबार भएकोमा यस दिन उक्त रकम बढेर ४ अर्ब ३७ करोड ५१ लाख ९६ हजार २३२ रुपैयाँ पुगेको छ।
यस दिन २६६ वटा धितोपत्रको १२ लाख २ हजार ३०८ कित्ता सेयर किनबेच भएको हो।
आइतबार किसान लघुवित्त र चन्द्रागिरी हिल्सको सेयरमूल्य सर्वाधिक १० प्रतिशतका दरले बढेको छ।
उक्त कम्पनीहरूको सेयर मूल्य क्रमशः ७९२ रुपैयाँ र एक हजार ४३९ रुपैयाँ ९० पैसा पुगेको छ।
सेयरमूल्य सर्वाधिक घट्नेमा एनआइबिएल ग्रोथ फण्ड रहेको छ। उक्त योजनाको इकाइ मूल्य १० प्रतिशतले घटेर प्रति इकाइ मूल्य ९ रुपैयाँ ३८ पैसामा सीमित भएको छ।
यस्तै, ८.५% नेपाल बैंक डिवेञ्चर २०८७ को मूल्य ५.८६ प्रतिशतले घटेको छ। उक्त डिवेञ्चरको मूल्य ८१८ रुपैयाँ १० पैसामा झरेको छ।
आइतबार शिवम् सिमेन्टको सर्वाधिक कारोबार भएको छ।
उक्त कम्पनीको प्रतिकित्ता ६४५ रुपैयाँ १० पैसामा १४ करोड ८१ लाख बराबरको सेयर कारोबार भएको हो।
यो मूल्य अघिल्लो दिनको तुलनामा १.५९ प्रतिशत बढेको हो।
सर्वाधिक सेयर खरिद–बिक्री हुने दोस्रो कम्पनीमा ज्योति विकास बैंक रहेको छ। उक्त कम्पनीको प्रतिकित्ता ३५३ रुपैयाँमा १३ करोड ७७ लाख रुपैयाँ बराबरको सेयर कारोबार भएको छ।
त्यस्तै, आज कारोबारमा आएका १३ वटा समूहगत परिसूचकमध्ये सबै समूहको परिसूचक बढ्दा समग्र नेप्से बढेको हो।
यस दिन बैंकिङ समूहको परिसूचक सर्वाधिक ४.९८ प्रतिशतले बढेको छ।
यस्तै, विकास बैंक समूहको परिसूचक ४.७८ प्रतिशतले बढेको छ।
-1746009348.jpg)
