राष्ट्र बैंकले लिएको कर्जा विस्तारको नीतिले आर्थिक वृद्धि हासिल नहुने बैंकरहरूले बताएका छन्।
नेपाल बैंकर्स एसोसिएसनका अध्यक्ष सुनिल केसीले भने, 'सरकारले लिएको ६ प्रतिशतको आर्थिक वृद्धिको लागि कम्तिमा पनि ८ खर्ब रूपैयाँ बराबरको थप कर्जा विस्तार हुनुपर्छ। तर, ८ खर्ब नै कर्जा विस्तार हुँदा कुल गार्हस्थ्य उत्पादन (जिडिपी) भन्दा पनि धेरै रकमको कर्जा लगानी भएको हुनेछ।'
बैंकरहरूका अनुसार अहिले निजी क्षेत्रमा जाने कर्जा जिडिपीको ९० प्रतिशत हाराहारी छ। यही कारण राष्ट्र बैंकले लिएको कर्जा विस्तारको नीति गलत नभएको बैंकरहरूले बताए।
राष्ट्र बैंकले चालु आर्थिक वर्षमा ११.५ प्रतिशतले कर्जा विस्तार हुने लक्ष्य लिएको छ। गत आर्थिक वर्षमा १२.६ प्रतिशतले कर्जा विस्तार गर्ने लक्ष्य राखिएको थियो। जेठसम्म बैंकहरूको कर्जा लगानी अनुसार यस वर्ष ५ खर्ब ६६ अर्ब रूपैयाँले कर्जा वृद्धि हुनेछ।
बैंकर केसीका अनुसार विगत १० वर्षको तथ्यांक हेर्ने हो भने एकवर्ष मात्र ५ खर्ब रूपैयाँभन्दा धेरै रकमको कर्जा गएको छ। उनका अनुसार आर्थिक वर्ष २०७७/७८ मा मात्रै ८ खर्ब १८ अर्ब रूपैयाँले कर्जा विस्तार भएको थियो।
अन्य वर्षहरूमा सरदर २/३ खर्ब हाराहारीले मात्रै कर्जा विस्तार हुने गरेको छ। आर्थिक वर्ष २०७८/७९ मा ४ खर्ब ५४ अर्ब रूपैयाँले कर्जा विस्तार भएको थियो।
-1746009348.jpg)
