घोराही सिमेन्ट, थ्रीस्टार हाइड्रोपावर र अप्पर स्याङ्गे हाइड्रोपावरको सेयर कारोबार आज (आइतबारदेखि) सुरू भएको छ।
स्पेसल प्रि–ओपन सेसनमा घोराही सिमेन्टको सेयर प्रतिकित्ता ५६५ रुपैयाँ ५० पैसामा पहिलो कारोबार भएको छ। यस्तै थ्रीस्टार हाइड्रोपावरको २५५ रुपैयाँ र अप्पर साङ्गे हाइड्रोपावरको २५३ रुपैयाँ ६० पैसामा कारोबार खुला भएको हो।
घोराही सिमेन्टको 'जिसिआइएल' संकेतमा कारोबार खुला भएको छ। यस्तै थ्रीस्टार हाइड्रोपावरको 'टिएसएचएल' संकेत र अप्पर स्याङ्गे हाइड्रोपावरको 'युएसएचएल' संकेतमा कारोबार खुला भएको छ।
यी तीनै वटा कम्पनीको आइपिओ बिहीबार नेप्सेमा सूचीकृत भएको हो।
नेप्सेमा घोराही सिमेन्टको ३ करोड ९७ लाख १९ हजार ६ कित्ता सेयर नेप्सेमा सूचीकृत भएको हो।
कम्पनीले सर्वसाधारण लगानीकर्ता सेयरधनीहरू (वैदेशिक रोजगारीमा रहेका नीपाली, उद्योग प्रभावित स्थानीय बासिन्दाहरू, सामूहिक लगानी कोष र कर्मचारीहरू समेत) लाई वितरण गरेको ७९ लाख ४३ हजार ८०१ कित्ता सेयर र संस्थापक सेयरधनीहरूले लगानी गरेका ३ करोड १७ लाख ७५ हजार २०५ कित्ता सेयर गरी सो परिमाणको सेयर नेप्सेमा सूचीकृत भएको हो।
कम्पनीले पहिलो कारोबारको लागि न्यूनतम २२६ रुपैयाँ ६१ पैसादेखि ६७९ रुपैयाँ ८३ पैसाको मूल्य रेञ्ज पाएको थियो।
यस्तै, बिहीबार नै थ्रीस्टार हाइड्रोपावरको ४९ लाख २५ हजार कित्ता सेयर नेप्सेमा सूचीकृत भएको थियो।
कम्पनीले सर्वसाधारण लगानीकर्ता सेयरधनीहरू (वैदेशिक रोजगारीमा रहेका नेपाली, उद्योग प्रभावित स्थानीय बासिन्दाहरू, सामूहिक लगानी कोष र कर्मचारीहरू समेत) लाई वितरण गरेको १२ लाख ३१ हजार २५० कित्ता सेयर र संस्थापक सेयरधनीहरूले लगानी गरेका ३६ लाख ९३ हजार ७५० कित्ता सेयर गरी सो सेयर नेप्सेमा सूचीकृत भएको हो।
कम्पनीको पहिलो कारोबारको लागि न्यूनतम ८५ रुपैयाँ ६५ पैसादेखि २५६ रुपैयाँ ९५ पैसासम्मको मूल्य रेन्ज तोकिएको थियो।
यसैगरी, अप्पर साङ्गे हाइड्रोपावरको २२ लाख कित्ता सेयर नेप्सेमा बिहीबार सूचीकृत भएको थियो।
कम्पनीले सर्वसाधारण लगानीकर्ता सेयरधनीहरू (वैदेशिक रोजगारीमा रहेका नेपाली, उद्योग प्रभावित स्थानीय बासिन्दाहरू, सामूहिक लगानी कोष र कर्मचारीहरू समेत) लाई वितरण गरेको ८ लाख ७० हजार कित्ता सेयर र संस्थापक सेयरधनीहरूले लगानी गरेका १३ लाख ३० हजार कित्ता सेयर गरी उक्त परिमाणको सेयर नेप्सेमा सूचीकृत भएको हो।
कम्पनीले पहिलो कारोबारको लागि न्यूनतम ८४ रुपैयाँ ५४ पैसादेखि २५३ रुपैयाँ ६२ पैसा मूल्य रेञ्ज पाएको थियो।
तीनै कम्पनीको माथि उल्लेखित रेञ्जभित्र रहेर पहिलो कारोबार खुला भएको हो।
नेप्सेले कम्पनीको वास्तविक नेटवर्थको तीन गुणासम्म पहिलो कारोबारको लागि मूल्य रेञ्ज तोक्ने गर्छ।
यस अवधिसम्म घोराही सिमेन्टको सेयर ९.२५ प्रतिशतले घटेर प्रतिकित्ता मूल्य ५१३ रुपैयाँ २० पैसामा कारोबार भइरहेको छ।
यस्तै, थ्रीस्टार हाइड्रोपावर र अप्पर स्याङ्गे हाइड्रोपावरको सेयर १० प्रतिशत र ९.९८ प्रतिशतले बढेर प्रतिकित्ता मूल्य क्रमशः २८० रुपैयाँ ५० पैसा र २७८ रुपैयाँ ९० पैसामा कारोबार भइरहेको छ।
