सोनापुर मिनरल्स एन्ड आयलले सोमबार आइपिओ निष्कासन गर्ने भएको छ।
कम्पनीले पहिलो चरणमा उद्योग प्रभावित क्षेत्रका स्थानीय बासिन्दा तथा वैदेशिक रोजगारीमा रहेका नेपालीका लागि आइपिओ निष्कासन गर्न लागेको कम्पनीका महाप्रबन्धक निर्देशक हरि पाठकले जानकारी दिए।
कम्पनीले जारी पुँजी तीन अर्ब सात करोड ५० लाख ५० हजार रूपैयाँको ४० प्रतिशत अर्थात एक अर्ब २३ करोड २० हजार रूपैयाँ बराबरको प्रतिसेयर १०० रूपैयाँ दरका एक करोड २३ लाख २०० कित्ता साधारण सेयर निष्कासन गर्ने महाप्रबन्धक पाठकले बताए।
यसमध्ये उद्योग प्रभावित क्षेत्र दाङ र रोल्पाका स्थानीयका लागि १०० रूपैयाँ अंकित मूल्यमा एक सय २५ रूपैयाँ प्रिमियम थप गरी प्रतिसेयर दुई सय २५ रूपैयाँमा १५ लाख ३७ हजार पाँच सय २५ कित्ता सेयर निष्कासन गर्न लागेको प्रबन्धक पाठकले जानकारी दिए।
सर्वसाधारणका लागि छुट्ट्याइएको सेयरको १० प्रतिशतले हुन आउने १० लाख ७६ हजार दुई सय ६८ कित्ता साधारण सेयर निष्कासन गर्न थालिएको कम्पनीले बताएको छ।
यो सेयर सरकारको सम्बन्धित निकायबाट श्रम स्वीकृति प्राप्त गरी विदेशमा रोजगार गरी रहेका नेपालीका लागि १०० रूपैयाँ अंकित मूल्यमा एक सय ३७ रूपैयाँ ५८ पैसा प्रिमियम थप गरी प्रति कित्ता दुई सय ३७ रूपैयाँ ५८ पैसामा निष्कासन गरिने महाप्रबन्धक पाठकले बताए।
आइपिओमा न्यूनतम १० कित्ताका लागि आवेदन दिनुपर्ने छ। आयोजना प्रभावित क्षेत्रका बासिन्दाले अधिकतम १५ लाख कित्ताका लागि आवेदन दिन सक्ने व्यवस्था गरिएको छ। वैदेशिक रोजगारीमा रहेका नेपालीले अधिकतम १० लाख ७६ हजार २६८ कित्ताका लागि आवेदन दिन सक्ने पाठकले जानकारी दिए।
आइपिओमा भदौ ११ गतेसम्म आवेदन दिन सकिनेछ। यो अवधिसम्म सम्पूर्ण कित्ताको लागि आवेदन नपरेमा स्थानीय बासिन्दाले भने भदौ २६ गतेसम्म आवेदन दिन पाउने व्यवस्था गरिएको छ।
कम्पनीलाई इन्फोमेरिक्स क्रेडिट रेटिङ नेपालले ‘आइआरएन ट्रिपल बी माइनस इस्युअर’ रेटिङ प्रदान गरेको छ। कम्पनीको सेयर निष्कासन तथा बिक्री प्रबन्धक एनआइएमबी एस क्यापिटल छ।
स्थानीय बासिन्दाले नेपाल इन्भेष्टमेन्ट, मेगा बैंक, सिटिजन्स इन्टरनेसनल बैंक, कुमारी बैंक, साइन रेसुंगा डेभलपमेन्ट बैंक, ग्लोबल आइएमई बैंक र प्राइम कमर्सियल बैंकका तोकिएका शाखा कार्यालयबाट आवेदन दिन पाउने छन्।
वैदेशिक रोजगारीमा रहेका नेपालीले नेपाल धितोपत्र बोर्डबाट स्वीकृति प्राप्त गरेका सम्पूर्ण सदस्य बैंक, वित्तीय संस्था र उनीहरूले तोकेका शाखा कार्यालय तथा सिडिएस एन्ड क्लियरिङले निर्माण गरेको सफ्टवेयर ‘मेरो सेयर’ अनलाइन प्रयोग गरी सी–आस्बा प्रणालीमार्फत आवेदन दिन सक्ने व्यवस्था गरिएको महाप्रबन्धक पाठकले जानकारी दिए।
-1746009348.jpg)
