धितोपत्र ब्रोकर एसोसिएसनले लगानीकर्ताले जति पनि डिम्याट खाता खोल्न सक्ने, नियमित बजार अवधिपछि न्यूनतम ३० मिनेटको अक्सन मार्केट सञ्चालन गर्नुपर्ने लगायतका व्यवस्था गर्न धितोपत्र बोर्ड समक्ष माग गरेका छन्।
नेपाल स्टक एक्सचेन्ज लिमिटेडको सञ्चालक समितिबाट पाश भएर नेपाल धितोपत्र बोर्ड समक्ष पेश भएको धितोपत्र व्यवसायी सदस्यता तथा सुपरीवेक्षण विनियमावली, २०७९ मा यी विषय समावेश गर्न ब्रोकरहरूले सुझाव दिएका हुन्।
मंगलबार धितोपत्र बोर्डका अध्यक्ष रमेश हमाललाई भेटेर एसोसिएसनका अध्यक्ष सागर ढकालले ज्ञापन पत्र बुझाएका हुन्।
हाल धितोपत्र बोर्डबाट लागु भएको २ वटा डिम्याट खातासम्बन्धी निर्देशनलाई खारेजी गर्दै जोखिम व्यवस्थापनको अपरिहार्य औजारको रुपमा रहने डिम्याट खातालाई लगानीकर्ताहरूको आवश्यकता अनुसार खुला छोड्न माग भन्दै ब्रोकरहरूले माग गरेका हुन्।
लगानीकर्ताहरू क्लोज आउटमा पर्ने समस्या समाधानको लागि नियमित बजार अवधिपछि न्यूनतम ३० मिनेटको अक्सन मार्केट सञ्चालन गर्न समेत उनीहरुले माग गरेका छन्।
हाल कारोबारपछि लगानीकर्ताहरूले समयमै सेयर दिन नसक्दा क्लोज आउटमा पर्ने गरेको र उनीहरूलाई २० प्रतिशत जरिवाना लाग्ने गरेको छ।
यसैगरी, ब्रोकर कम्पनीका सेयरधनी, कर्मचारी तथा परिवारहरूलाई आफ्नै कम्पनीबाट मात्रै कारोबार गर्ने व्यवस्था मिलाएमा यसबाट नियामक निकायहरूलाई समेत नियमन तथा सुपरीवेक्षण कार्यमा सहयोग पुग्ने उनीहरूको भनाइ छ।
हाल ब्रोकर कम्पनीमा आवद्धहरूले आफ्नो तथा परिवारको नाममा सेयर कारोबार गर्नु अघि नेप्सेबाट पूर्व स्वीकृति लिएर मात्रै कारोबार गर्ने व्यवस्था छ। यसको पूर्ण खारेजीको माग ब्रोकरहरूले गरेका हुन्।
धितोपत्र बोर्डमा स्वीकृतिको लागि पुगेको विनियमावलीमा ब्रोकरहरूलाई हाल ३ दिनसम्म निलम्बन गर्न सकिने व्यवस्थालाई बढाएर विनियमावली १५ दिन पुर्याउन लागिएको छ।
यो व्यवस्थाले ब्रोकर कम्पनीमा आवद्ध लगानीकर्ताहरूलाई ठूलो मर्का पर्ने भएकोले यसलाई खारेज गरेर ब्रोकर कम्पनी वा कम्पनीका पदाधिकारीहरूलाई नगद जरिवाना गर्ने व्यवस्था लागु गर्न समेत माग गरेका छन्।
-1746009348.jpg)
