असोजमा पनि सेयर बजारका लगानीकर्ताहरू निरुत्साहित भएका छन्। यही कारण आइतबार सेयर बजार परिसूचक उच्च अंकले घटेको छ।
यस दिन नेप्से परिसूचक ४२.१४ अंकले घटेर १९६४.९१ बिन्दुमा बन्द भएको छ।
धेरै लगानीकर्ता वाणिज्य बैंकहरूले असोजमा मुद्दती निक्षेपको ब्याजदर घटाउनेछन् भन्ने अपेक्षामा थिए। त्यस विपरीत बैंकहरूले ब्याजदर बढाएका हुन्।
पछिल्लो समय अर्थमन्त्रालयले स्थानीय तहको सञ्चित कोषमा रहेको रकमको ६० प्रतिशत रकम बैंकहरूले निक्षेपमा गणना गर्न पाउने व्यवस्था गरिदिएको थियो। यससँगै बैंकहरूमा ६३ अर्ब रुपैयाँ बराबरको निक्षेप थपिएको थियो।
यसरी स्थानीय तहको रकम दिँदा ब्याजदर बढाउन नपाइने शर्त अर्थमन्त्रालयले राखेको भन्दै लगानीकर्ताहरू ढुक्क देखिएका थिए।
आइतबार नेप्से परिसूचक घटेपनि कारोबार रकम भने अघिल्लो दिनको तुलनामा बढेको छ।
गत कारोबार दिन १ अर्ब ४९ करोड ५५ लाख २१ हजार ९०५ रुपैयाँको सेयर कारोबार भएकोमा यस दिन उक्त रकम बढेर २ अर्ब २ करोड ८४ लाख ६५ हजार ६१० रुपैयाँ पुगेको छ।
यस दिन २७८ वटा धितोपत्रको ५६ लाख ५९ हजार ४५८ कित्ता सेयर किनबेच भएको हो।
आइतबार शुभम् पावरको सेयरमूल्य सर्वाधिक १० प्रतिशतले बढेको छ।
उक्त कम्पनीको सेयर मूल्य ९८५ रुपैयाँ ६० पैसा पुगेको छ।
यस्तै, थ्री स्टार हाइड्रोपावरको सेयर मूल्य ७.८९ प्रतिशतले बढेर प्रति कित्ता मूल्य ३३७ रुपैयाँ ७० पैसा कायम भएको छ।
सेयर मूल्य सर्वाधिक घट्नेमा मोलुङ हाइड्रोपावर रहेको छ।
उक्त कम्पनीको सेयर मूल्य ९.२१ प्रतिशतले घटेर प्रति कित्ता मूल्य १७१ रुपैयाँ ६० पैसामा सीमित भएको छ।
यस्तै, मेन्छियाम हाइड्रोपावरको सेयर मूल्य ८.४६ प्रतिशतले घटेर प्रति कित्ता मूल्य २११ रुपैयाँ कायम भएको छ।
आइतबार एनआइसी एशिया बैंकको सर्वाधिक कारोबार भएको छ।
उक्त कम्पनीको प्रतिकित्ता ८१४ रुपैयाँमा २७ करोड ५४ लाख बराबरको सेयर कारोबार भएको हो।
यो मूल्य अघिल्लो दिनको तुलनामा ०.६१ प्रतिशत घटेको हो।
सर्वाधिक सेयर खरिद–बिक्री हुने दोस्रो कम्पनीमा रिलायबल नेपाल लाइफ इन्स्योरेन्स रहेको छ। उक्त कम्पनीको प्रतिकित्ता ४९५ रुपैयाँमा २४ करोड ५२ लाख रुपैयाँ बराबरको सेयर कारोबार भएको छ।
त्यस्तै, आज कारोबारमा आएका १३ वटा समूहगत परिसूचकमध्ये सबै समूहको परिसूचक घट्दा समग्र नेप्से घटेको हो।
यसदिन व्यापार समूहको परिसूचक सर्वाधिक ३.३३ प्रतिशतले बढेको हो।
यस्तै, वित्त समूहको परिसूचक ३.३० प्रतिशतले बढेको छ।
