सूचीकृत कम्पनीहरूले चालु आर्थिक वर्ष २०८२–८३ को तेस्रो त्रैमासको वित्तीय विवरण सार्वजनिक गरिरहेका छन्।
वित्तीय विवरण आएपछि यस्ता कम्पनीको मूल्यमा कस्तो प्रभाव देखियो त?
हालै कामना सेवा विकास बैंक र मन्जुश्री फाइनान्सले वित्तीय विवरण प्रकाशित गरेका छन्।
वैशाख ६ गते वित्तीय विवरण प्रकाशित गरेको कामना विकास बैंकको सेयर मूल्यमा खासै प्रभाव परेको देखिँदैन।
वित्तीय विवरण आउनुअघि प्रतिकित्ता ४८५ रूपैयाँमा कारोबार भइरहेको यसको सेयर बुधबार ४८४ रूपैयाँमा कारोबार भएको छ।
२०७४ सालमा कामना र सेवा विकास बैंक मर्ज भएर कामना सेवा विकास बैंक बनेको हो। यसको एक वर्षको उच्च मूल्य ५८८ रूपैयाँ छ। केही वर्षको तथ्यांक हेर्दा २०७८ भदौमा मूल्य ८६६ रूपैयाँसम्म पुगेको थियो।
बुधबार ४६५ रूपैयाँबाट कारोबार सुरू भएपछि लगातार ४८४ रूपैयाँ पुगेको हो। यो दिन हरियो लामो मैनबत्ती आकृति बनेको छ। यसले मूल्य सुधारको क्रमले निरन्तरता पाउन सक्ने सम्भावना देखाउँछ।
तर मैनबत्ती आकृतिमा स्पष्ट प्रवृत्ति देखाएको छैन। त्यसैले लगानी गर्दा ध्यान दिन जरूरी छ।
कामना सेवा विकासको वित्तीय विवरणले नाफामा भने सुधार भएको देखाएको छ। यसको नाफा ४९ करोड रूपैयाँबाट बढेर ५८ करोड रूपैयाँ पुगेको छ।
मुख्य आम्दानीको स्रोत ब्याज आम्दानीमा सुधार भएको छ। यसको खुद ब्याज आम्दानी एक अर्ब ६६ करोडबाट बढेर एक अर्ब ८१ करोड पुगेको छ।
कामना सेवाले कर्जा जोखिमका लागि पहिलेभन्दा कम प्रावधान राखेको छ। यस्तो प्रावधान रकम ३१ करोड रहेकामा यस पटक २८ करोड रूपैयाँ छ।
यसको खराब कर्जा ४.२७ प्रतिशतबाट बढेर ४.४० प्रतिशत पुगेको छ। यसले वितरण योग्य नाफाबाट वार्षिक १४.१५ प्रतिशत लाभांश दिने क्षमता देखाएको छ।
यसअघिको वर्ष यस्तो क्षमता १८.९८ प्रतिशत थियो।
यसको प्रतिसेयर आम्दानी २० रूपैयाँ ५ पैसा र प्रतिसेयर नेटवर्थ १६३ रूपैयाँ छ।
त्यस्तै, बुधबार वित्तीय विवरण प्रकाशित गरेको मन्जुश्री फाइनान्सको सेयर भाउ पाँच रूपैयाँ बढेर ७९४ रूपैयाँमा कारोबार भएको छ।
२०६९ कात्तिकबाट सेयर कारोबार भएको यसको सेयर मूल्य २०७८ मा १४५६ रूपैयाँसम्म पुगेको थियो।
बुधबार ८११ रूपैयाँबाट कारोबार सुरू भएपछि लगातार घटेर ७७८ रूपैयाँसम्म पुगेको थियो। बजार बन्द हुँदा अघिल्लो दिनको भन्दा पाँच रूपैयाँ बढेको हो।
बुधबार सानो शरीर भएको रातो मैनबत्ती आकृति बनेको छ। यसले मूल्यलाई लिएर लगानीकर्तामा दुविधा नै रहेको देखाउँछ। त्यसैले बिहीबारको कारोबार हेरेर लगानी नीति बनाउनु सही हुन्छ।
मन्जुश्री फाइनान्सको वित्तीय विवरणले नाफामा सुधार भएको देखाएको छ। यसको नाफा १७ करोड रूपैयाँबाट बढेर २२ करोड रूपैयाँ पुगेको छ।
मुख्य आम्दानीको स्रोत ब्याज आम्दानीमा सुधार भएको छ। यसको खुद ब्याज आम्दानी ६२ करोडबाट बढेर ६८ करोड रूपैयाँ पुगेको छ।
मन्जुश्रीले कर्जा जोखिमका लागि पहिलेभन्दा कम प्रावधान राखेको छ। यस्तो प्रावधान रकम १४ करोड रहेकामा यस पटक ११ करोड रूपैयाँ छ।
यसको खराब कर्जा ४.३० प्रतिशतबाट बढेर ३.९९ प्रतिशत भएको छ।
यसले वितरण योग्य नाफाबाट ३० करोड रूपैयाँ बराबर लाभांश दिन सक्ने उल्लेख गरेको छ। यो २२ प्रतिशत लाभांश क्षमता हो। यसअघि यस्तो क्षमता १४ प्रतिशत थियो। यसको प्रतिसेयर आम्दानी २१ रूपैयाँ ६० पैसा र प्रतिसेयर नेटवर्थ १८२ रूपैयाँ छ।
