नेपाल उद्योग वाणिज्य महासंघका अध्यक्ष अन्जन श्रेष्ठले विपद्का कारण उद्योग–व्यवसाय ध्वस्त भएका व्यवसायीलाई राज्यले राहतसँगै दीर्घकालीन सामाजिक तथा आर्थिक सुरक्षा दिनुपर्ने बताएका छन्।
नेपाल आर्थिक पत्रकार समाज (सेजन) को २८औं वार्षिक साधारणसभामा बोल्दै श्रेष्ठले भोटेकोसी बाढीबाट ठूलो क्षति बेहोरेका व्यवसायीलाई आवास कर्जा, बीमा, पुनर्कर्जा लगायतका सुविधा उपलब्ध गराउन सरकारसँग आग्रह गरे।
जीवनभर राज्यलाई कर तिर्दै आएका व्यवसायी विपद्मा पर्दा राज्यबाट उनीहरूले पाउने संरक्षणबारे सरकारले स्पष्ट व्यवस्था गर्नुपर्ने उनको भनाइ छ।
श्रेष्ठले निजी क्षेत्रले विपद्का बेला राज्यलाई सहयोग गर्दै आए पनि अहिले आफैं संकटमा परेको भन्दै प्रभावित उद्योग–व्यवसायको पुनःस्थापनामा सरकारले प्राथमिकता दिनुपर्ने बताए।
क्षतिग्रस्त व्यवसाय पुनः सञ्चालनका लागि निजी क्षेत्रले पनि आफ्नोतर्फबाट सहयोग जारी राख्ने उनले बताए।
उनले आयातमा निर्भरता घटाउन नेपालमै उत्पादन गर्न सकिने वस्तुको उत्पादन बढाउनुपर्नेमा जोड दिए।
जलविद्युत लगायतका क्षेत्रमा लगानी विस्तार र औद्योगिकीकरण तीव्र बनाउन सरकार र निजी क्षेत्रबीच सहकार्य आवश्यक रहेको उनले बताए।
सरकारले आगामी पाँच वर्षमा अर्थतन्त्रको आकार बढाउने र रोजगारी सिर्जना गर्ने लक्ष्य अघि सारेकाले त्यसमा निजी क्षेत्र सहकार्य गर्न तयार रहेको श्रेष्ठले बताए।
-1746009348.jpg)
