निजी क्षेत्रको हवाई सेवाप्रदायक सीता एयरले तराई तथा सुगम क्षेत्रका विमानस्थलमा उडान सुरु गर्ने तयारी गरेको छ। हाल पहाडी तथा हिमाली क्षेत्रमा उडान गरिरहेको एयरलाइन्सले सुगममा उडान शुरु गर्नका लागि तयारी अघि बढाएको हो।
एयरलाइन्सलाई ७२ सिटे एटिआर जहाज ल्याउन सरकारले अनुमति दिएको छ। सीतालाई चार ओटा जहाज ल्याउनका लागि संस्कृति पर्यटन तथा नागरिक उड्डयन मन्त्रालयले अनुमति दिएको हो।
मन्त्रालयका अनुसार सीताले पाँच जहाजका लागि आवेदन दिएपनि अहिले भएका जहाज जतिलाई मात्र अनुमति दिइएको हो।
कुनै पनि एयरलाइन्सले जहाज थप गर्दा मन्त्रालयबाट पहिला अनुमति लिनुपर्छ। त्यसपछि नेपाल नागरिक उड्डयन प्राधिकरणले जहाज किन्ने तथा सञ्चालनको अनुमति दिन्छ।
एयरलाइन्सले एटिआर ७२/५०० सिरिजको जहाजबाट तराईका अधिकाशं विमानस्थल तथा पोखरा उडान गर्ने योजना बनाएको छ।
एयरलाइन्सले एटिआर ल्याएर धेरै यात्रुको चाप हुने विमानस्थलमा उडान गर्ने तयारी गरेको हो।
नेपालीहरुको हवाई यात्रा गर्ने ट्रेन्ड बढेपछि ठूला एयरलाइन्स धमाधम जहाज थपमा लागिरहँदा पहाडी क्षेत्रमा केन्द्रित एयरलाइन्स सीताले पनि उक्त क्षेत्रमा नजर लगाएको हो।
हाल ड्रोनियरका ४ जहाजबाट पूर्वदेखि पश्चिमसम्मका पहाडी क्षेत्रमा उडान गरिरहेको एयरलाइन्सले एटिआर ल्याएपछि भैरहवा,नेपालगञ्ज,विराटनगरजस्ता विमानस्थलमा उडान गर्ने प्रारम्भिक योजना बनाएको छ।
एटिआरबाट उडान गर्ने हाल नेपालमा दुइवटा एयरलाइन्स मात्र रहेका छन्। बुद्ध र यति एयरलाइन्सले अहिले एटिआरबाट उडान गरिरहेका छन्।
बुद्धसँग एटिआर ७२(७) र एटिआर ४२(३) सिरिजका कूल १० जहाज छन् भने यतिसँग एटिआर ७२ पाँचवटा छन्।
प्रकाशित मिति: सोमबार, कात्तिक २५, २०७६, १०:५४:००
