नेपाल कम्युनिष्ट पार्टीका अध्यक्ष पुष्पकमल दाहाल प्रचण्डले कम्युनिष्ट नेताहरु सत्तामा पुगेपछि राजा/महाराजा जस्तै हुने गरेको बताएका छन्।
ललितपुरस्थित स्टाफ कलेजमा आयोजित प्रोग्रेसिभ इन्जिनियरिङ्ग एसोसिएशन नेपालको प्रशिक्षण कार्यक्रममा अध्यक्ष दाहालले विश्वभरीका कम्युनिष्टहरु सत्तामा पुगेपछि आफूले गरेको त्याग, तपस्या, बलिदान बिर्सेर राजामहाराजा जस्तै हुने बताए।
'सत्तामा नपुगुञ्जेल जनता, राष्ट्र र समाजको हितमा काम गर्छन्। मार्क्सवादको वर्ग अध्ययन, चिन्तन, मनन गरी जनताको मन जित्न सफल हुन्छन्,' उनले भने, 'तर यी सबै कुरा सत्तामा पुगेसँगै बिस्तारै बिर्सिदै र बुर्जुवाकरण हुँदै जान्छन्।'
जनताका लागि लडेका कम्युनिष्ट नेता नै महाराजा बनेपछि जनताले नै उनीहरुलाई लखेट्न खोजेको उनको तर्क छ।
‘कम्युनिष्ट नेता नै राजामहाराजा जस्ता हुँदै गएपछि राजामहाराजाका विरुद्ध लडेका जनताहरुले यिनलाई पनि लखेट्न पर्छ भने, लखेटे,’ उनले भने।
यस्तो बिडम्बना इतिहासमा पनि देखेको उल्लेख गर्दै सोही लक्षण अहिले पनि देखिन थालेको उनले बताए।