भदौ २३ र २४ को घटना छानबिन गर्न गठित जाँचबुझ आयोगले तत्कालीन प्रधानमन्त्री तथा नेकपा एमाले सभापति केपी शर्मा ओलीलाई बयानमा बोलाउन पत्र काट्ने भएको छ।
जाँचबुझ आयोगका अध्यक्ष गौरीबहादुर कार्कीले बिहीबार सिंहदरबारमा सञ्चारकर्मीहरूसँग कुरा गर्दै ओलीलाई बयानमा बोलाउन पत्र पठाउन लागेको जानकारी दिएका हुन्।
एमाले अध्यक्ष ओलीले भने आयोगमा बयान नदिने बताउँदै आएका छन्। उनले आफूलाई गोली हाने पनि बयान नदिने अडान लिइरहेका छन्।
यसै सम्बन्धमा सञ्चारकर्मीहरूले 'ओली बयान दिन आउनुभएन भने के गर्नुहुन्छ' भनेर अध्यक्ष कार्कीलाई सोधेका थिए।
जबाफमा कार्कीले भने, 'त्यो कुरा त्यति बेलै थाहा हुन्छ।'
आयोगले तत्कालीन गृहमन्त्री रमेश लेखकसँग बुधबार दोस्रो चोटि बयान लिएको थियो। लेखकको बयान पूरा भइसकेको कार्कीले जानकारी दिए।
जाँचबुझ आयोगको समयसीमा तीन महिनाको भए पनि काम नसकिएकाले थप एक महिना म्याद थप भएको छ। उनले आयोगका कामका विषयमा सरकारसँग कुरा भएको पनि बताए।
'काम कहाँ पुग्यो भन्ने विषयमा कुराकानी भयो। अब एक महिना म्याद थपेको छ। त्यही भित्र बुझाउँछौं हामी,' उनले भने।
-1746009348.jpg)
