सहरी विकास राज्यमन्त्री रामवीर मानन्धरले लकडाउनका कारण समस्यामा परेका सर्वसाधारणलाई सीधै आफूसँग सम्पर्क गर्न आग्रह गरेका छन्।
काठमाडौं क्षेत्र नम्वर ७ का निर्वाचित सांसद समेत रहेका मन्त्री मानन्धरले लकडाउनका क्रममा सर्वसाधारणलाई पर्न सक्ने समस्या समाधानका लागि आफू २४ सै घण्टा तयार रहेको बताए। मानन्धरले आफूसहित आफ्नो सचिवालयका सदस्यहरुसँग सिधा सम्पर्क गरेर समस्या राख्न आग्रह समेत गरेका छन्।
लकडाउनको सीमा बढेसँगै देशभरका जनताको दैनिकीमा समस्या नआओस् भन्नेमा सरकार सतर्क रहेको बताउँदै मन्त्री मानन्धरले सहरी क्षेत्रका सर्वसाधारणको सीमिततालाई मध्यनजर गर्दै काठमाडौंका जनतासँग हातेमालो गर्न आफू तयार रहेको बताए।
देशभरका ४० हजार जनप्रतिनिधि रहेका छन्। सरकारी नियुक्ति पाएकाको पनि गणना गर्ने भए अझै बढी हुन्छ। सबैले आफ्ना कार्यक्षेत्रलाई मात्रै ध्यान दिएपनि जनता भोकै मर्नुपर्दैन राज्यमन्त्री मानन्धरले सेतोपाटीसँग भने, जनप्रतिनिधिहरुले जनतालाई बेवास्ता गरे भनेर बदनाम भइरहेको बेला जनताको सेवा गर्ने मौका पनि यहि हो। जोकोही पनि अफ्ठ्यारो परेर मेरो सम्पर्कमा आउँदा म सकेको सहयोग गर्छु।
देशभर सरकारले संयन्त्र बनाएर जनताको जीवन रक्षाका लागि तीब्र रुपमा महत्वपूर्ण काम गरिरहेको बताउँदै मन्त्री मानन्धरले तत्काल काठमाडौंका जनतामा पर्ने समस्या समाधानका लागि आफूले सहजीकरण गरिरहेको बताए ।
कोरोना भाइरसविरुद्धको महायुद्धमा विश्वनै होमिइरहेको अवस्थामा नेपाल सरकारको पहिलो दायित्व जनताको जीवन रक्षा भएको बताउँदै मानन्धरले सरकारले विभिन्न राहत प्याकेज ल्याइसकेको पनि बताए।
मन्त्री मानन्धरले विषम परिस्थितिमा मुलुक रहेकाले सीमितताका बीचमा दैनिकी चलाउन पनि आग्रह गरेका छन् । यस्तो समयमा घरभित्रै बसेर सरकारले गरिरहेको पहललाई साथ दिन आम नागरिकलाई मन्त्री मानन्धरले आह्वान समेत गरेका छन्।
मन्त्री मानन्धरले सहरी क्षेत्रका मजदुर र आर्थिक अवस्था कमजोर भएका वर्गका नागरिकका लागि सहयोग गर्न चाहनेहरुले एकद्वार प्रणाली मार्फत् सहयोग गर्न सक्ने पनि बताएका छन्।
मन्त्री मानन्धरले काठमाडौंमा समस्यामा परेका सर्वसाधारणलायृ आफ्नो मोबाइल नम्वर ९८५११५९५९२ मा सिधा सम्पर्क गर्न वा आफ्नो सचिवालयका प्रमुख स्वकीय सचिव ओम राजवाहक र अर्का स्वकीय सचिव जयप्रकाश श्रेष्ठसँग सम्पर्क गर्न आग्रह गरेका छन्।
प्रकाशित मिति: मंगलबार, चैत १८, २०७६, १७:५०:००
