प्रतिनिधिसभा निर्वाचनको समानुपातिकतर्फ आधाभन्दा बढी मतगणना सम्पन्न हुँदा राष्ट्रिय स्वतन्त्र पार्टीले झन्डै ५० प्रतिशत मत प्राप्त गरेको छ।
फागुन २१ गते भएको प्रतिनिधिसभा निर्वाचनमा ११० सिटका लागि मतदाताले समानुपातिक निर्वाचन प्रणालीअन्तर्गत दलका लागि मत दिएका थिए।
हालसम्म ६६ लाख ५६ हजार मतगणना सम्पन्न भएको छ। मतदानमा १ करोड ९ लाख मत खसेको थियो।
पछिल्लो मत परिणाम अनुसार रास्वपाले ३२ लाख ४८ हजार ५६० मत प्राप्त गरेको छ। यो ४८.८ प्रतिशत हुन्छ।
त्यस्तै, नेपाली कांग्रेसले १० लाख ९७ हजार ६४६ मत प्राप्त गरेको छ। यो १६.४८ प्रतिशत हो।
नेकपा एमालेले ९ लाख ३३ हजार १८३ (१४ प्रतिशत), नेपाली कम्युनिस्ट पार्टीले ४ लाख ६५ हजार ९७ (६.९ प्रतिशत) र राष्ट्रिय प्रजातन्त्र पार्टीले २ लाख ३० हजार ४५९ (३.४ प्रतिशत) मत प्राप्त गरेका छन्।
त्यस्तै, हर्क साम्पाङ नेतृत्वको श्रम संस्कृति पार्टीले १ लाख ८९ हजार ३५६ (२.८ प्रतिशत) र उपेन्द्र यादव नेतृत्वको जनता समाजवादी पार्टी नेपालले ९३ हजार १७६ (१.३ प्रतिशत) मत ल्याएका छन्।
प्रतिनिधिसभा निर्वाचनमा समानुपातिकतर्फ ३ प्रतिशत मत कटाउने दलले सिटमा भाग पाउँछन्। जारी मतगणना अनुसार रास्वपा, कांग्रेस, एमाले, नेकपा र राप्रपाले मात्र ३ प्रतिशतको 'थ्रेसहोल्ड' कटाउने देखिएको छ।
मतगणना अहिलेकै अनुपातमा अघि बढे रास्वपाले समानुपातिकतर्फ ६० सिट प्राप्त गर्नेछ।
त्यस्तै, नेपाली कांग्रेसले २० सिट, नेकपा एमालेले १७ सिट, नेकपाले ८ सिट र राप्रपाले ५ सिट जित्नेछ।
समानुपातिकतर्फ अहिलेकै अनुपातमा रास्वपाले मत कायम राखे उसले दुई-तिहाइ सिट प्राप्त गर्न सक्नेछ। रास्वपाले अहिलेसम्म प्रत्यक्षतर्फ १२४ सिटमा जित हात पारेको छ।
गोरखा-१ मा रास्वपाका उम्मेदवार सुधन गुरूङले मतगणनामा अग्रता हासिल गरिरहेका छन्। यो सिटमा समेत रास्वपा विजयी भए उसले प्रत्यक्षतर्फ १२५ सिट प्राप्त गर्नेछ।
समानुपातिक तर्फको ६० सिट जोड्दा रास्वपा १८५ सिटमा विजयी हुनेछ।
२७५ सदस्यीय प्रतिनिधिसभामा दुई-तिहाइ बहुमत प्राप्त गर्न १८४ सिटमा जित हात पार्नुपर्छ। रास्वपाले अहिलेकै अनुपातमा मत प्राप्त गर्ने हो भने उसले दुई-तिहाइ सिटमा जित हात पार्न सक्ने देखिन्छ।
-1746009348.jpg)
