कोरोना भाइरस सङक्रमणविरुद्ध एकजुट हुन विश्वका १ सय ९३ दलले संयुक्त अपिल गरेका छन्।
विश्वभरका सरकारी प्रयासलाई बलियो बनाउनुका साथै जनतालाई सचेत बनाई महाविपत्तिको सामना गर्नुपर्ने संयुक्त अपिलमा उल्लेख गरिएको छ।
चिनियाँ कम्युनिष्ट पार्टी लगायत विश्वका १ सय ९३ दलहरुले दस बुँदे अपिल जारी गरेको र यसमा नेकपा पनि संलग्न रहेको सो पार्टीले जनाएको छ।
नेकपाका विदेश विभाग प्रमुख एवम् पूर्व प्रधानमन्त्री माधवकुमार नेपालले विज्ञप्ति जारी गर्दै कोरोना भाइरसको प्रभावकारी नियन्त्रण र रोकथामका लागि अन्तराष्ट्रिय समन्वय र सहकार्य आवश्यक रहेको उल्लेख गरेका छन्।
समान चिन्ताका साथ तयार गरिएको दस्तावेजले संकटका बेला एकजुट भएर अघि बढ्न विश्वलाई प्रेरित गर्ने अपेक्षा गरिएको उनले बताएका छन्।
तत्काल आवश्यक पर्ने मेडिकल उपकरण र सुरक्षात्मक सामग्रीको सीमापार आदानप्रदानको उचित स्तर कायम राख्न समेत सबै राष्ट्रलाई आग्रह गरिएको छ।
'अहिलेको प्रकोप रोक्न अनुभवको साझेदारी, चिकित्सा सहकार्य तथा विशेष औषधी, खोप र परीक्षणको संयुक्त अनुसन्धान र विकास आवश्यक छ' अपिलमा भनिएको छ 'हामी यस कार्यमा सहयोग पुर्याउने राष्ट्रहरुलाई समर्थन गर्दछौँ। हामी विकासशील र कमजोर जनस्वास्थ्य प्रणाली भएका राष्ट्रहरुलाई सामग्री, प्राविधिक र अन्य सहयोगका लागि आग्रह गर्दछौं।'
प्रभावकारी रोकथाम र नियन्त्रणका लागि जी २० र अन्य अन्तर्राष्ट्रिय संयन्त्र अन्तर्गत समन्वय र सहकार्य बढाउन समेत अपिल गरिएको छ।