नयाँ सरकारबारे के भन्छन् सहिद परिवार?
जेनजी आन्दोलनको बलमा भएको प्रतिनिधिसभा निर्वाचनले बालेन शाहको नेतृत्वमा सरकार बनाउन राष्ट्रिय स्वतन्त्र पार्टी (रास्वपा) लाई स्पष्ट 'म्यान्डेट' दिएको छ। यो सरकारबाट सारा देशले परिवर्तनको अपेक्षा गरेको छ। सबभन्दा बढी अपेक्षा ती परिवारको छ, जसका छोराछोरी जेनजी आन्दोलनमा सहिद भए।
यसै सन्दर्भमा हामीले जेनजी आन्दोलनका सहिद परिवारसँग निर्वाचन परिणामबारे उनीहरूको धारणा के छ र नयाँ बन्ने सरकारप्रति उनीहरूले के आशा लिएका छन् भनेर सोधेका छौं।
***
मधु सारू मगरले अहिलेसम्म नेपाली कांग्रेसबाहेक अरू पार्टीलाई भोट हालेकी थिइनन्।
उनी सानै हुँदादेखि आमाबुबाले कांग्रेसमा भोट हाल्ने गरेको सुन्दै हुर्किइन्। ठूली भएपछि उनले पनि त्यसैलाई निरन्तरता दिइन्।
विवाहपछि पनि कांग्रेसकै 'रूख' चिह्नमा मतदान गर्दै आएकी मधुले भदौ २३ गतेसम्म रूखबाहेक अरू चिह्नमा भोट हाल्छु भन्ने सोचेकीसम्म थिइनन्।
तर भदौ २३ को जेनजी आन्दोलनमा जे भयो, त्यसले कांग्रेस लगायत पुराना दलप्रति मन मरेको उनी बताउँछिन्।
यसको पछाडि उनको व्यक्तिगत पीडा जोडिएको छ — त्यस दिन मधुले आफ्ना २० वर्षीय छोरा माधव मगरलाई गुमाएकी थिइन्।
अर्घाखाँची भूमिकास्थान नगरपालिका–४ घर भएका माधव प्रहरीको गोली लागेर सहिद भएका थिए।
'त्यति बेला एमाले अध्यक्ष केपी शर्मा ओली प्रधानमन्त्री भए पनि उनको सरकारलाई कांग्रेसको साथ थियो। अझ गृहमन्त्री त कांग्रेसकै रमेश लेखक थिए। मैले जीवनभर भोट हाल्दै आएको कांग्रेस संलग्न सरकारले नै त्यत्रो नरसंहार गर्यो भन्ने विश्वासै लाग्दैन,' उनी भन्छिन्, 'पहिले पुराना दलहरूको आलोचना हुँदा म उनीहरूकै पक्षमा बोल्थेँ। तीन करोड नेपाली जनतालाई चित्त बुझाउन गाह्रो हुन्छ, बिस्तारै काम हुँदैछ भन्थेँ। तर जेनजी आन्दोलनमा जसरी कलिला बालकहरूमाथि गोली चलाइयो, त्यो घटनापछि मेरो मन मर्यो।'
उनले अगाडि भनिन्, 'सरकारमा बसेको मान्छेले गोली चलाउने आदेश नदिएको भए कसैले ज्यान गुमाउनुपर्दैन थियो। आदेशबिना त प्रहरीले यसै गोली चलाएनन् होला नि!'
माधव उनका तीन सन्तानमध्ये जेठा छोरा थिए। एसइईसम्म गाउँमै पढेका माधवले बुटवलबाट प्लस–टू गरेका थिए। प्लस–टू सकेर यसै वर्ष जेठमा काठमाडौं आएको मधु सम्झन्छिन्।
'थप अध्ययन र काम गर्ने सपना बोकेर काठमाडौं गएको थियो। तर यो सहरले उसको ज्यान लियो,' मधुले भनिन्, 'मलाई त अहिले छोराको ज्यान लिएको सहरमा आउन पनि मन लाग्दैन।'
उनका अनुसार माधव कीर्तिपुरमा साथीहरूसँगै बसेर काम गरिरहेका थिए। उनी छोराको मृत्यु भएको पाँच दिनपछि काठमाडौं आएकी थिइन्।
'छोराको मृत्यु भएपछि गाउँका केही नेताबाहेक कोही भेट्न आउनुभएन,' उनले भनिन्, 'तर रास्वपा सभापति रवि लामिछाने भेट्न आउनुभयो। मेरो दु:ख सुन्नुभयो। मलाई हिम्मत दिएर फर्किनुभयो।'
उनले थपिन्, 'रवि लामिछानेले सहिदको रगत खेर जान दिन्नँ भन्नुभएको छ।'
आफू दु:खमा परेका बेला लामिछानेका तिनै शब्दले रास्वपातर्फ आकर्षित भएको उनी बताउँछिन्।
त्यसैबीच जब काठमाडौं महानगरपालिकाका तत्कालीन मेयर बालेन शाह पनि रविसँग जोडिए, यो नयाँ शक्तिले देशमा परिवर्तन ल्याउँछ भन्ने आस झनै बढाएको उनको भनाइ छ।
त्यही आसले यसपालि पहिलो पटक मत परिवर्तन गर्दै रास्वपालाई भोट हालेको बताउने मधुले भनिन्, 'पुरानो दलतिर मन र मत दुवै गएन।'
अब बन्ने बालेन सरकारले जनताको हकहितका पक्षमा काम गर्छ भन्ने उनको विश्वास छ। जेनजी आन्दोलनका घाइते र सहिद परिवारका लागि केही उपलब्धिमूलक काम गर्ला भन्ने पनि उनलाई लागेको छ।
'जसले निर्वाचित गरायो, उनीहरूका मुद्दा बिर्सिदैनन् भन्ने मेरो विश्वास छ,' उनले भनिन्, 'नयाँ पनि पुरानाजस्तै आस मात्र देखाउने भए जनताले यिनलाई पनि बाँकी छाड्दैनन्। भदौ २३ गते छातीमा गोली खाएका सहिद र घाइतेका परिवार चुप लागेर बस्दैनन्।'
यी पनि पढ्नुहोस्:
-1746009348.jpg)
