प्रमुख प्रतिपक्षी नेपाली कांग्रेसका सांसद प्रदीप गिरिले अभिमन्यु चक्रव्युँहमा परेझैं कृषिमन्त्री घनश्याम भुसाल पनि तन्त्रमा प्रवेश गरेको बताएका छन्।
प्रतिनिधिसभा संसद बैठकमा शनिबार बोल्दै सांसद गिरिले भने, ‘आदरणीय कमरेड। तपाईं अभिमन्यु चक्रव्युँहमा प्रवेश गरेझैं एउटा तन्त्रमा प्रवेश गर्नुभएको छ।’
मन्त्री भुसाल निर्विवाद रूपले प्रतिभाशाली र प्रतिवद्ध रहेको उल्लेख गर्दै सांसद गिरिले कृषि र पशुपन्छी मन्त्रालयबारेका बजेट आफूले पढेको बताए।
‘कृषिमन्त्रीका अभिव्यक्तिमा पनि आएका छन्- ए मन्त्री भएर के-के न गरौं भनिठानेको त केही पनि गर्न सकिँदैन रहेछ।
आदरणीय कमरेड, तपाईं अभिमन्यु चक्रव्युँहमा प्रवेश गरेझैं एउटा तन्त्रमा प्रवेश गर्नुभएको छ,’ उनले भने।
मन्त्री भुसाल कस्तो अप्ठेरोमा परेछु भन्नेमा रहेको उल्लेख गर्दै उनले प्रधानमन्त्रीसमेत रहेका नेकपा अध्यक्ष मात्र नभई यो व्यवस्था नै जिम्मेवार रहेको बताए।
‘अभिमन्यु गौरवशाली पात्र थिए। मैले कमरेड भुसाललाई उहाँसँग तुलना गरिसकेपछि थप भन्न पर्दैन,’ उनले भने।
उनले कनिका छरेजस्तो बजेट नछर्न पनि आग्रह गरेका छन्। ‘खतरनाक किसिमले बजेट कनिका छरेझैं छरिएको छ,’ उनले भने।
