परराष्ट्रमन्त्री प्रदीप ज्ञवालीले नेपाल र चीनबीच सगरमाथाको उचाई नाप्दा हिउँको उचाई मान्ने कि नमान्ने भन्ने विषयमा छलफल भइरहेको बताएका छन्।
राष्ट्रियसभाको बैठकमा उठेका प्रश्नहरुको जवाफ दिँदै ज्ञवालीले भने ‘हामीले सुरुदेखि नै स्नो लाइनलाई पनि मानेर ८ हजार ८४८ मिटर मान्यौं, तर पछि चीनले नाप्दा हिउँको रेखा भन्दा तल नापेर वास्तविक चट्टान ८ हजार ८४४. ४३ मिटर उल्लेख गर्यो।’
सगरमाथाबाट नै सिमाना जाने भएकाले त्यसको हाइट सहमतिबाट मात्रै टुङ्ग्याउन सकिने अवस्था भएकाले त्यो विवाद नटुङ्गिएको उनले बताए।
नेपालले पनि सगरमाथाको उचाई नापिसकेको र चीनले केही समयअघि नै नापिसकेकोले अब डाटाहरु एकअर्काबीच आदान प्रदान हुने मन्त्री ज्ञवालीले बताए।
उनले भने ‘छिट्टै अब नेपालको तर्फबाट सगरमाथाको उचाई घोषणा गर्ने तयारी हुँदैछ।’
प्रकाशित मिति: सोमबार, असार १५, २०७७, १४:५५:००
