नेकपा एमाले पार्टी परित्यागको घोषणा गरेका रूपन्देहीको तिलोत्तमा नगरपालिकाका पूर्वनगर प्रमुख वासुदेव घिमिरे पुनः एमालेको काममै फर्किएका छन्।
घिमिरेले मंगलबार साँझ सामाजिक सञ्जाल फेसबुकमा स्टाटस लेख्दै एमाले परित्याग गरेको घोषणा गरेका थिए।
उनले पार्टी परित्यागको घोषणा गरेपछि बिहीबार रूपन्देही आएका एमाले उपाध्यक्ष विष्णु पौडेलको पहलकदमी र तिलोत्तमाका अन्य नेता–कार्यकर्ताको आग्रहपछि उनी एमालेमै फर्किएर पार्टी काममा सक्रिय बन्न सहमत भएका हुन्।
घिमिरे र पौडेलबीच बिहीबार दिउँसो चार–पाँच घण्टा कुराकानी भएको थियो। सो क्रममा पौडेलले उनलाई पार्टीको काममै फर्किन आग्रह गरेका थिए। पौडेलले बिहाीबार राति नै सामूहिक तस्बिर सार्वजनिक गर्दै घिमिरे एमालेमै रहेको सन्देश दिएका थिए।
बिहीबार दिनभर छलफलमा सँगै रहेका घिमिरे र पौडेल शुक्रबार पनि विभिन्न कार्यक्रममा सँगसँगै देखिए।
एमाले बुटवलका नगर अध्यक्ष शोभाखर पोखरेलले शुक्रबार बुटवलका विभिन्न कार्यक्रममा पौडेल र घिमिरे सँगसँगै रहेको तस्बिर र भिडिओ फेसबुकमार्फत सार्वजनिक गरेका छन्।
विघटित संघीय सांसद समेत रहेका घिमिरेले एमाले परित्याग गरेको घोषणा गरे पनि उनी कुनै पार्टीमा प्रवेश गरिसकेका थिएनन्।
यद्यपि पहिल्यैदेखि नै काठमाडौं महानगरपालिकाका मेयर बालेन शाहसँग निकट रहेका कारण धेरैले उनलाई राष्ट्रिय स्वतन्त्र पार्टी (रास्वपा) प्रवेश गर्ने आकलन गरेका थिए।
सेतोपाटीसँगको कुराकानीमा घिमिरेले पनि आफूलाई रूपन्देही क्षेत्र नम्बर २ बाट निर्वाचन लड्ने गरी प्रस्ताव आएको बताएका थिए।
तर एमाले उपाध्यक्ष पौडेलसँगको छलफलपछि उनी एमालेकै काममा फर्किन सहमत भएका हुन्।
एमाले रूपन्देहीले पनि घिमिरेले दिएको राजीनामा अस्वीकृत गरिदिएको छ।
घिमिरेले मंगलबार राति नै एमाले तिलोत्तमा नगर कमिटीलाई सम्बोधन गर्दै पार्टीबाट राजीनामा दिएको पत्र पठाएका थिए।
उक्त पत्रमा गहिरो आत्ममन्थन र मनका धेरै भावनाहरू बोकेर, बदलिँदो परिस्थितिका कारण पार्टीको संगठित सदस्य पदबाट राजीनामा दिएको उल्लेख गरेका थिए।
घिमिरेले पार्टीसँग बिताएका अतीतहरू आफ्नो जीवनका महत्त्वपूर्ण अनुभूति, सिकाइ र प्रतिबद्धताले भरिएको तथा विचार, संगठन र संघर्षका क्षणहरू सधैं स्मृतिमा राख्दै पार्टीले दिएको माया, विश्वास र जिम्मेवारीप्रति सधैं कृतज्ञ रहने उल्लेख गरेका थिए।
साथै भिन्न परिस्थितिका कारण पार्टी परित्यागको निर्णयमा पुगे पनि पार्टी र एमालेका नेता तथा कार्यकर्ताप्रति आफ्नो सम्मान र शुभेच्छा सदा कायम रहने बताएका थिए।
घिमिरे एमालेमै रहेर पार्टी काममा सक्रिय बन्न सहमत भएपछि एमाले रूपन्देहीले उनको राजीनामा अस्वीकृत गरिदिएको हो।
एमाले रूपन्देहीका अध्यक्ष यज्ञ गैरेले नेता घिमिरेको योगदान पार्टी कामको क्षेत्रमा मात्रै नभई व्यावसायिक क्षेत्र र संसदीय क्षेत्रमा समेत महत्त्वपूर्ण रहेको उल्लेख गर्दै सामाजिक सञ्जालमार्फत दिएको राजीनामा जिल्ला कमिटीले अस्वीकृत गरेको बताएका छन्।
अध्यक्ष गैरेले घिमिरेको विगतको राजनीतिक इतिहास स्मरण गराउँदै पार्टी कामलाई निरन्तरता दिएर थप क्रियाशील हुन पनि आग्रह गरेका छन्।
'२०४८ साल पुस १२ गते पार्टीको संगठित सदस्यता प्राप्त गरी निरन्तर रूपमा पार्टीमा सक्रिय रहँदै लुम्बिनी प्रदेश कमिटी सदस्यका साथै हालै सम्पन्न ११ औं राष्ट्रिय महाधिवेशन प्रतिनिधिमा तपाईं अत्यधिक मतका साथ विजयी हुनुभएको थियो। प्रजातान्त्रिक राष्ट्रिय युवा संघ नेपालमा संगठित हुँदै पार्टीमा आबद्ध भएर अनवरत रूपमा विभिन्न कमिटीमा रहेर काम गर्दै यहाँसम्म आइपुग्नुभएको हामी सबैलाई जगजाहेर नै छ,' गैरेले लेखेका छन्।
घिमिरेले भने बिहीबार दिउँसोदेखि नै मोबाइल स्विच अफ गरेका कारण उनीसँग कुराकानी हुन सकेन।
एमालेबाटै तिलोत्तमा नगरपालिकाको मेयर र क्षेत्र नम्बर ५ बाट प्रतिनिधिसभा सदस्य निर्वाचित भइसकेका घिमिरेले पार्टी परित्याग गरेको घोषणा गरेपछि उनलाई 'अवसरवादी' र 'पदलोलुप' भनेर आरोप लागेको थियो।
घिमिरे हालै सम्पन्न एमालेको ११ औं महाधिवेशनका लागि लोकप्रिय मत पाएर प्रतिनिधि जितेका घिमिरे केन्द्रीय सदस्यमा भने पराजित भएका थिए।
केन्द्रीय सदस्यका लागि संस्थापन पक्षको टिममा पर्न नसकेपछि उनी पराजित भएका थिए।
-1746009348.jpg)
