सत्तारूढ नेपाल कम्युनिष्ट पार्टी नेकपाका प्रवक्ता नारायणकाजी श्रेष्ठले पार्टीमा भित्र एउटा बाहिर अर्कै कुरा गर्ने प्रवृत्ति रहेको औंल्याएका छन्।
यस्तो प्रवृत्ति नै पार्टीभित्र देखिएको अहिलेको समस्या रहेको श्रेष्ठको भनाइ छ।
‘हाम्रो पार्टीभित्र अहिलेको एउटा समस्या सिधा र खुला छलफल गर्नुको सट्टा भित्र एउटा कुरा बाहिर अर्को कुरा र एक ठाउँमा एउटा कुरा अर्को ठाउँमा अर्कै कुरा गर्ने प्रवृत्ति पनि हो,’ सोमबार सामाजिक सञ्जालमा श्रेष्ठले लेखेका छन्।
यस्ता प्रवृत्तिले पार्टीभित्रका समस्या समाधान गर्न सहयोग नगर्ने पनि उनले बताएका छन्।
‘यस्ता समस्याले समाधान गर्न सहयोग गर्दैन। बरू जटिल बनाउँछ। त्यसैले पार्टी, वर्ग, आन्दोलन, देश र जनतालाई केन्द्रविन्दूमा राखेर सिधा, खुला र स्पष्ट रूपमा छलफल गरौं,’ प्रवक्ता श्रेष्ठले भनेका छन्, ‘सकरात्मक निकास निकालौं।’
उनले पार्टी एकताको रक्षा गर्न पनि सबैमा आग्रह गरेका छन्।
‘पार्टी एकताको रक्षा गरौं। समाजवाद उन्मुख सामाजिक आर्थिक रूपान्तरण गर्दै समाजवादको बाटोमा अघि बढौं,’ श्रेष्ठको आग्रह छ।
कम्युनिष्ट पार्टीको उद्देश्य समाजमा सर्वोत्तम लोकतन्त्रको अभ्यास गर्नु भएको उनको भनाइ छ।
पार्टीभित्र आन्तरिक लोकतन्त्र सुनिश्चित हुनु पहिलो शर्त हुने उनको भनाइ छ। अन्तरपार्टी जनवाद, बहस र अन्तरसंघर्षलाई पार्टीको जीवन र चालक शक्ति मानिने पनि उनले उल्लेख गरेका हुन्।
‘अन्तरसंघर्षलाई स्वस्थ र रूपान्तरणमुखी ढंगले सञ्चालन गर्नाले विचारको परिमार्जन एवं विकास, संगठनको व्यवस्थापन, परिचालन एवं सुदृढीकरण र सामाजिक रूपान्तरणको क्रान्तिकारी उद्देश्यमा योगदान पुर्याउँछ। अन्तरसंघर्षलाई सार्थक निष्कर्षमा पुर्याउन वैचारिक, सैद्धान्तिक, राजनीतिक, प्रवृत्तिगत र मुद्दागत रूपमा सिधा, खुला र स्पष्ट छलफल गर्ने कार्यशैली अख्तियार गर्नुपर्छ,’ श्रेष्ठले भनेका छन्।
नेकपा स्थायी कमिटीमा केपी शर्मा ओलीले अध्यक्ष र प्रधानमन्त्रीबाट राजीनामा दिनुपर्ने आवाज शीर्ष नेताबाटै आएपछि विवाद जारी छ। केही समयदेखि स्थायी कमिटी बैठक पनि बस्न सकेको छैन।
केही दिनअघि श्रेष्ठलाई प्रधानमन्त्री ओलीका प्रमुख सल्लाहकार विष्णु रिमालले पार्टी प्रवक्ता पदको लाज जोगाउन आग्रह गरेका थिए।
‘विधि र पद्धतिको नक्कली गीत गाउँदै नेताहरूलाई गुटबन्दीको आगोमा पोल्न उत्तोलक नबन्नुस्। पार्टी एकताविरूद्धका कुनै पनि गतिविधि कतैबाट पनि नहोस्। मुलुक संवेदनशील मोडमा छ महशुस होस्,’ ट्वीटमा श्रेष्ठलाई मेन्सन गर्दै रिमालले लेखेका थिए।