नेकपा वरिष्ठ नेता माधवकुमार नेपालले प्रधानमन्त्री एवम् पार्टी अध्यक्ष केपी शर्मा ओली बैठकबाट भाग्न खोजेको आरोप लगाएका छन्।
सोमबार आफ्नै निवास कोटेश्वरमा आएका केन्द्रीय सदस्यहरूसँग कुराकानी गर्दै वरिष्ठ नेता नेपालले पार्टीलाई विधिबाट चलाउनुको विकल्प नरहेको समेत बताएका थिए।
'पार्टीलाई विधिमा फर्काउन बैठक बस्ने हो। बैठक बस्न केपी कमरेडलाई हामीले निरन्तर मिहिनेत गरेर बैठकमा ल्याउनुपर्छ,' नेपालको भनाइ उद्धृत गर्दै एक केन्द्रीय सदस्यले भने, 'केपी कमरेड बैठकबाट भागिरहनुभएको छ। बैठकमा ल्याउन अन्तिमसम्म कोसिस रहन्छ। त्यसैका लागि प्रयत्न गर्ने हो। बैठकमा ल्याएपछि पार्टीमा उठेका तमाम विषयमा छलफल गरेर एउटा निष्कर्ष निकाल्नुपर्छ।'
वरिष्ठ नेता नेपाललाई भेट्न केन्द्रीय सदस्यहरू दिलु पन्त, राजेन्द्र राई, निरज आचार्य, रामकुमारी झाँक्री, ठाकुर गैरे, माधव अर्याल, गणेश पहाडी, यज्ञराज सुनुवार, जगन्नाथ खतिवडा, विजय पौडेल लगायत गएका थिए।
भेटमा नेपालले ६३ जना सांसदले पार्टी विभाजनविरुद्ध हस्ताक्षर बुझाउनु सकारात्मक भएको भन्दै त्यसको प्रशंसा समेत गरे।
कतिपय केन्द्रीय सदस्यले प्रधानमन्त्री ओलीको निर्देशनमा तलसम्म कार्यक्रम भएकाले त्यसको जवाफमा आफूहरूले पनि भेला गर्नुपर्ने धारणा राखेका थिए।
जवाफमा वरिष्ठ नेता नेपालले अरूले भेला गरे भन्दैमा भेला गर्न नहुने बताएका थिए। मदन भण्डारी फाउन्डेसनका नाममा वडा तहसम्म गुटबन्दी गरेको ओलीइतर समूहले आरोप लगाउँदै आएका छन्।
त्यस्तै वरिष्ठ नेता नेपालले पार्टी कुनै हालतमा नफुट्ने समेत दावी गरेका थिए।
'उनीहरूले फुटाउँदैमा पार्टी फुट्दैन। पार्टी उनीहरूको मात्रै पनि होइन। उनीहरूसँग पार्टी फुटाउने कुनै आधार छैन किनकी सबै पद उनीहरूले पाएका छन्,' नेपालको भनाइ उद्धृत गर्दै अर्का केन्द्रीय सदस्यले भने, 'हाम्रो स्थिति राम्रो छ। सबैतिर बहुमत छ। हामीले फुटाउन जरुरी छैन।'
केन्द्रीय सदस्यहरूसँग वरिष्ठ नेता नेपालले प्रधानमन्त्री ओलीले बैठक बोलाउनुको विकल्प नरहेको समेत बताएका थिए।
'नेकपालाई जोगाउने भनेको विधिमा फर्काएर हो। विधिमा फर्काउन बैठक बस्ने हो,' केन्द्रीय सदस्य निरज आचार्यले भने, 'बैठकले जे जे निर्णय गर्छ, त्यसलाई सामूहिक ढंगले स्वीकार्नुपर्छ। यो भनेको विधि हो। विधिमा नफर्काइकन कम्युनिस्ट पार्टी जोगाउन सकिन्न।'
साउन १४ गते केन्द्रीय कमिटि बैठकको माग गरेर हस्ताक्षर बुझाएकाले त्यसको एक महिनाभित्र बैठक बस्नुपर्ने माग आफूहरूले गरेको केन्द्रीय सदस्य दिलु पन्तले बताइन्।
'भदौ १४ गते एक महिना पुग्छ। तपाईंहरू चुप लागेर बस्नुभएको त छैन नि भनेर हामीले जिज्ञासा राख्यौं। बैठक बाहिरबाट समाधान खोज्ने होइन भनेर उहाँले पनि भन्नुभएको छ, 'उनले भनिन्, 'विधि, पद्दतिमा चल्ने कुरा गर्नेलाई गाली गर्नुपर्ने कारण छैन। गाली मार्क्सवादी सिद्धान्त होइन। गालीले पार्टी चल्दैन।'
