गृहमन्त्री रामबहादुर थापाले हुम्लामा चीनले नेपाली भूमि अतिक्रमण नगरेको दाबी गरेका छन्।
हुम्लामा नेपाल-चीन सीमा विवाद आइरहेका बेला थापाले यस्तो बताएका हुन्।
‘चीनले नेपाली भूमि अतिक्रमण गरेको छैन,’ उनले भने।
परराष्ट्र मन्त्रालयले नै यसबारे स्पष्ट पारिसकेकाले मिडियामा आएजस्तो नेपाली भूमि अतिक्रमण नभएको उनले बताए।
उनले प्रदेशमा मुख्यमन्त्री परिवर्तन गर्नेबारे निर्णय नभएको बताएका छन्। दार्चुलामा निर्माण गरिएको सशस्त्र प्रहरी गुल्मको उद्घाटन गरी शनिवार सुर्खेत आएका गृहमन्त्री थापाले पार्टी र सरकारका तर्फबाट मुख्यमन्त्री परिवर्तन गर्ने भन्ने निर्णय नभएको बताएका हुन्।
नेकपाको स्थायी कमिटीले केन्द्र र प्रदेशको सरकार पुनर्गठन गर्ने निर्देशन दिएको भए पनि निर्णय भने नभएको उनले बताए। ‘यसमा सम्बन्धित पक्षले निर्णय गर्ला, तर अहिले नै मुख्यमन्त्री परिवर्तनको निर्णय भएको छैन,’ उनले भने ।
प्राकृतिक विपदको जोखिममा रहेका नागरिकलाई सुरक्षित स्थानमा सार्न सरकारले सुरक्षित आवास निर्माणका लागि गृहकार्य गरिरहेको उनले जानकारी दिए। देशभर बाढी र पहिरोले जनधनको ठूलो क्षति पुर्याएकोले सुरक्षित आवास निर्माणको गृहकार्यमा सरकार लागेको उनले बताए।
‘कुन ठाउँ बढी जोखिम छ र कस्तो ठाउँमा बस्ती बसाल्दा उपयुक्त हुन्छ भन्ने प्रतिवेदन तयार गरिरहेकाले सोही प्रतिवेदनका आधारमा सुरक्षित बस्ती बसाल्ने काम हुन्छ,’ गृहमन्त्री थापाले भने।
