प्रधानमन्त्री केपी शर्मा ओलीले आफूलाई प्रतिनिधि सभाबाट विश्वास भए नभएको यकिन गर्न सोमबार प्रतिनिधि सभाको अधिवेशन आव्हान गर्दै बैठक डाकेका छन्। विश्वासको मत सिद्ध गर्ने प्रयोजनका लागि डाकिएको बैठकमा सोमबारै मतदान हुने नहुने निश्चित छैन।
प्रतिनिधि सभाको नियमावली अनुसार सभामुख अग्नि सापकोटाले विश्वासको मत लिने प्रधानमन्त्रीको प्रस्ताव पेश हुने दिन र समय तोक्नुपर्नेछ। उनले भोली नै उक्त प्रस्ताव पेश गर्न प्रधानमन्त्रीलाई समय दिन सक्नेछन्।
संघीय संसद सचिवालयका प्रवक्ता रोजनाथ पाण्डेका अनुसार भोली नै सभामुखले दोश्रो बैठक राखेर अविश्वासको प्रस्ताव अगाडि बढाउने तयारी गरेका छन्। पहिलो बैठकमा राष्ट्रपतिले अधिवेशन आव्हान गरेको पत्र पढेर सुनाइनेछ।
प्रतिनिधि सभा नियमावलीको नियम १५२ अनुसार प्रधानमन्त्री केपी शर्मा ओलीले विश्वासको मतका लागि आग्रह गर्दै वक्तव्य दिनेछन्। वक्तव्यपछि सभामुखले प्रधानमन्त्रीको प्रस्तावमा छलफल गराउनेछन्।
सबै सांसदले विश्वासको मत दिने नदिने विषयमा बोल्न चाहेमा मतदान मंगलबार अबेर वा बुधबार मात्र हुनेछ। संसदमा पूर्व प्रधानमन्त्री र पूर्व सभामुखले बोल्न चाहेको अवस्थामा समयको पाबन्दी रहँदैन। उनीहरुले बोल्न चाहे पर्याप्त समय पाउनेछन्। सांसदहरुलाई सभामुखले कम्तिमा ५ मिनेटको समय निर्धारण गरेको अवस्थामा पनि छलफल कम्तिमा मंगलबारसम्म हुनेछ।
छलफलपछि प्रधामन्त्री केपी शर्मा ओलीले उठेका जवाफ दिनेछन्। प्रधानमन्त्रीको जवाफ पछि संसदमा मत विभाजन हुनेछ। सांसदहरुले विश्वास भए नभएको हस्ताक्षर गरेरै मत दिनुपर्नेछ।
संसद सचिवालयले कोरोना लागेका सांसदहरुलाई पनि मतदानमा सहभागि गराउने तयारी गरिरहेको छ। उनीहरुलाई छुट्टै मतदान स्थल राख्ने तयारी सचिवालयको छ। प्रधानमन्त्रीले विश्वासको मत पाउन नसके सो को जानकारी सभामुखले राष्ट्रपतिलाई दिनेछन्। नियमावलीको नियम १५२ को उपनियम ८ मा सभामुखले विश्वासको मत पाउन नसकेको जानकारी राष्ट्रपतिलाई दिने व्यवस्था छ।