आन्तरिक विवादले गाँजेको प्रमुख प्रतिपक्षी दल नेकपा एमालेले आफ्ना २२ जना सांसदलाई २४ घन्टे स्पष्टीकरण सोधेको छ।
बुधबार दिउँसो उनीहरूलाई स्पष्टीकरण पत्र पठाइएको छ। स्पष्टीकरणमा कुनैमा साउन ४ र कुनैमा ५ गतेको मिति राखिएको छ।
पत्रको व्यहोरा भने सबैलाई उस्तै छ। पार्टीको हितविपरीत विभिन्न भेला गरेको, गुटगत गतिविधि सञ्चालन गरेको र विपक्षी गठबन्धनमा सामेल भई अपराधजन्य निर्णय गरेकोलगायत आरोपमा उनीहरूलाई पार्टी अध्यक्ष केपी शर्मा ओलीले स्पष्टीकरण सोधेका हुन्।
स्पष्टीकरण सोधिएका सबै सांसदहरूले साउन ३ गते नेपाली कांग्रेसका सभापति शेरबहादुर देउवालाई विश्वासको मत दिएका थिए। देउवालाई विश्वासको मत दिएकै कारण सोधिएको स्पष्टीकरणमा उक्त कुरा भने उल्लेख नै गरिएको छैन।
अहिले स्पष्टीकरण सोधिएका सबै सांसद सुरूदेखि नै ओलीविरूद्धको गठबन्धनमा सहभागी पनि थिएनन्। उनीहरूमध्ये १४ जनाले देउवालाई प्रधानमन्त्री बनाउन राष्ट्रपति कार्यालय र सर्वोच्च अदालतमा हस्ताक्षर बुझाएका थिए भने बाँकी यो सबै प्रक्रिया हुँदा ओली समूहमै थिए। स्पष्टीकरण सोधिएका सांसद प्रेमबहादुर आले त जेठसम्मै ओली मन्त्रिपरिषदमा मन्त्री नै थिए।
ओली प्रधानमन्त्री हुँदा पहिलो पटक प्रतिनिधि सभा विघटन गरेका बेला नै त्यसको चर्को आलोचना गरेका विरोध खतिवडा र रामकुमारी झाँक्री र पहिलो विघटनपछि मन्त्री बनाइएका र दोस्रो विघटनपछि हटाइएका आलेलाई पनि उस्तै विषयमा स्पष्टीकरण सोधिएको हो।
सर्वोच्च अदालतले संविधानको धारा ७६ को ५ अनुसार बनेको सरकारलाई विश्वासको मत दिनु सांसदको व्यक्तिगत अधिकार भएकाले सोही विषयमा कारबाही गर्न नपाइने आदेश दिएकाले ओलीले उक्त कुरा उल्लेख नै नगरी देउवालाई विश्वासको मत दिने एमाले सांसदलाई स्पष्टीकरण पत्र थमाएका हुन्।
वरिष्ठ नेता माधवकुमार नेपाल पक्षले भने ओली समूहले सोधेको स्पष्टीकरणको कुनै अर्थ नभएको र यसले पार्टी एकता प्रक्रियामा भाँजो हाल्ने बताएको छ।
