नेकपा (माओवादी केन्द्र) को केन्द्रीय कमिटीको पहिलो दिनको बैठक सकिएको छ।
कमलादीस्थित नेपाल प्रज्ञा प्रतिष्ठानमा भएको बैठकको पहिलो दिन अध्यक्ष पुष्पकमल दाहाल ‘प्रचण्ड’ले बैठक एजेन्डाहरू पेस गरेका थिए।
बैठकका एजेन्डामा सहिदप्रति श्रद्धाञ्जली, केन्द्रीय सदस्यको शपथ, बैठक सञ्चालनको प्रक्रियाबारे अध्यक्षबाट जानकारी, प्रदेशको रिपोर्टिङ अध्यक्षहरूले गर्ने, अध्यक्षको रिपोर्टिङ, पोलिटब्युरो, स्थायी समिति र पदाधिकारी गठन, कार्यविभाजन र संरचना, स्थानीय तह चुनावको समीक्षा, आगामी निर्वाचन र विविध विषयमा छलफल गर्ने विषय छन्।
आजको बैठकमा अध्यक्ष प्रचण्डले अहिलेको राजनीतिक अवस्थाबारे संक्षिप्त प्रतिवेदन पेस गरेका छन्। उनले स्थानीय तह चुनावमा नेपाली कांग्रेसले ठाउँ-ठाउँमा धोका दिएको र नेकपा (एकीकृत समाजवादी)ले हैसियतभन्दा बढी सिट दाबी गरेकाले केही समस्या भएको उल्लेख गरेका छन्।
प्रचण्डले बैठकबाट पोलिटब्युरो र स्थायी कमिटी गठन हुने बताए पनि पदाधिकारी चयनबारे भने मौनता साँधेका छन्। बैठकको एजेन्डामा पदाधिकारी चयन पनि छ।
बैठकमा सातै प्रदेशमा अध्यक्ष र विशेष कमिटीका अध्यक्षहरूले आ-आफ्नो धारणा राखेका छन्।
कर्णाली प्रदेशकी अध्यक्ष विमला केसीले गठबन्धनको भर पर्नुको साटो आफ्नै बुतामा पार्टी निर्माण गर्नुपर्ने बताइन्।
‘कहिले एउटालाई पहिलो पार्टी बनाउने, कहिले अर्कोलाई पहिलो बनाउँदा बनाउँदै हामी सधैँ तेस्रो हुने परिस्थिति अन्त्य गर्नुपर्छ,’ केसीले भनिन्,‘अब हामीले पनि जग बलियो बनाएर अगाडि बढ्नु पर्छ। नत्र त कहिले कसैलाई कहिले कसैलाई भोट हाल्दाहाल्दै आफ्नो चुनाव चिन्ह बिर्सन अवस्था आउँछ।’
उपत्यका विशेष प्रदेश कमिटीका अध्यक्ष जगत सिम्खडाले अहिलेकै तालले पार्टी निर्माणको काम नहुने बताएका थिए।
भोलि बिहान ११ बजे फेरि बस्ने गरी पहिलो दिनको बैठक सकिएको छ।