जनता समाजवादी पार्टी (जसपा) नेपालका अध्यक्ष उपेन्द्र यादवले उत्पीडित समुदाय र क्षेत्रमाथि भएको विभेद, भेदभाव र असमानता विरूद्धको संघर्ष जारी रहेको बताएका छन्।
बिहीबार जसपा–एमालेले सप्तरीको राजविराजमा आयोजना गरेको संयुक्त विशाल जनसभालाई सम्बोधन गर्दै उनले यस्तो बताएका हुन्।
‘देशमा शासन व्यवस्था परिवर्तन भए तर जनताको अवस्थामा भने अझै परिवर्तन आउन सकेको छैन,’ सप्तरी क्षेत्र नम्बर २ बाट प्रतिनिधि सभा सदस्यका उम्मेदवार समेत रहेका अध्यक्ष यादवले भने, ‘देशमा चरम गरिबी, बेरोजगारी लगायत समस्या जस्ताको त्यस्तै छन्। जातजाति र भूगोलको आधारमा भएको असमानतालाई अन्त गर्दै समृद्ध राष्ट्र निर्माणका लागि विभेद र भेदभावबाट जनता मुक्त हुनुपर्छ।’
देशमा व्याप्त महँगी र बेरोजगारी समस्या समाधानका लागि उद्योगधन्दा र कलकारखाना स्थापना गर्नुपर्नेमा जोड दिँदै अध्यक्ष यादवले सप्तरीमा यसको आधार प्रारम्भ भइसकेकाले पूर्णता पाउन साथ जिल्लाका हजारौं युवाहरूले रोजगारी पाउने बताए।
उनले ती सबैखाले विभेद अन्त्यका लागि अझै संघर्ष आवश्यक रहेको बताए।
‘जनसंख्याका आधारमा मधेसीको सहभागिता कम छ। नागरिकता सम्बन्धी समस्या अझै कायमै छ,’ उनले भने।
