प्रधानमन्त्री तथा नेकपा(माओवादी केन्द्र) का अध्यक्ष पुष्पकमल दाहाल 'प्रचण्ड' ले जनयुद्धलाई कसैले दबाउन नसक्ने बताएका छन्।
बिहीबार एक कार्यक्रममा बोल्दै प्रधानमन्त्री प्रचण्डले जनयुद्धलाई जति दबाउन खोजे पनि पटक–पटक उठिराख्ने बताएका हुन्।
'मैले यो पटक प्रधानमन्त्री भएपछि पृथ्वी जयन्तीको दिनलाई पनि बिदा दिने निर्णय गराएँ। मानिसहरूलाई त के गर्यो प्रचण्डले भन्ने पनि लाग्छ,' उनले भने, 'तर नेपालको इतिहासमा त्यो ऐतिहासिक परिघटना थियो। जसले आधुनिक नेपाल निर्माणको प्रक्रियामा एउटा कोसेढुंगाको भूमिका खेल्यो।’
'जनयुद्ध' दिवस भनेर अहिले निकै ठूलो टीकाटिप्पणी हुने गरेको उनले बताए।
'ऐतिहासिक भौतिकवादी हुनुका नाताले भौतिक ढंगले त्यसलाई सम्मान गर्नु हाम्रो कर्तव्य हो भन्ठाने मैले। अरूले सकेका थिएनन्। धेरै भए प्रधानमन्त्री शान्ति सम्झौतापछि। कुरा त गर्थे तर कसैले आँट गरेका थिएनन्। मैले आँट गरेँ। यो आँट गरेकोमा सबैले ठीकै माने कसैले विरोध गरेनन्। तर मैले अर्को पनि गरेँ जनयुद्ध दिवस भनेर त्यसको चाहिँ अहिले निकै ठूलो टीकाटिप्पणी हुने गरेको छ,' उनले भने।
उनले अगाडि भने, 'मलाई के लाग्छ भने पृथ्वीनारायण शाहको एक खालको कर्म पछिको ठूलो कर्म नेपाली जनताले अगाडि ल्याएको त्यहीँ नै हो। त्यसलाई अहिले जति दबाउन खोजे पनि इतिहासमा पटक–पटक त्यो उठिराख्छ। त्यो चिहानबाट फेरि उठ्छ। किनभने हजारौं मान्छेहरूले आफूखुसी बलिदान गरेको आन्दोलनलाई कसैले दबाएर अहिले एकछिन दबाइयो भने पनि फेरि उठ्छ त्यो। कार्ल मार्क्सले भन्नुभएको थियो, महान उद्देश्यको निम्ति समर्पित भएर त्याग गर्ने सहिदहरू कहिल्यै मर्दैनन्। अहिले एकछिन दबाइएर चिहानमा पुरिए पनि चिहानबाट फेरि ती जाग्छन्। र जिउँदा मान्छेका निम्ति प्रेरणा भएर फेरि आउँछन्। ती हजारौं सहिदहरू कहिल्यै पनि दबिने छैनन्।’
