उपप्रधानमन्त्री एवं गृहमन्त्री नारायणकाजी श्रेष्ठले जाजरकोट, रूकुम पश्चिम र बझाङका भूकम्प प्रभावितहरूका लागि राहत पठाउन सरकारले उपेक्षा नगरेको बताएका छन्।
आइतबार विपद जोखिम न्युनिकरण तथा व्यवस्थापन कार्यकारी समितिको १९ औं बैठकलाई सम्बोधन गर्दै उनले जाजरकोट, रूकुम पश्चिम र बझाङका भूकम्प प्रभावितहरूका लागि राहत पठाउन सरकारले उपेक्षा नगरेको स्पष्ट पारेका हुन्।
उनले आफूहरूले भूकम्पपछि कत्ति पनि ढिलो नगरी त्रिपाल, टेन्ट, म्याट्रेस, ब्ल्यांकेट र खाद्यान्नहरू पठाएको र पठाउने क्रम जारी रहेको बताए।
उनले सरकारसँग भएको साधन र स्रोतका अनुसार राहत पठाइरहेको बताए।
‘हामीले एक क्षण, एक सेकेण्ड ढिलो नगरीकन हामीले पठाउन सकिने सम्पूर्ण त्रिपाल, टेन्ट, म्याट्रेस, ब्ल्यांकेट, खाद्यान्नहरू पठाइराखेका छौं। राहतमा हाम्रो ध्यान गएको छ। हामीले हाम्रो साधन, स्रोतले सामानहरूको हकमा हामीले व्यवस्था गरेका छौं तर पुर्याउने साधन त चाहियो,’ उनले भने।
सवारीसाधन पुग्ने बाटोहरू नहुँदा एकैदिनमा पुर्याउन कठिन भएको उनले बताए।
‘स्काइ भ्यान प्रयोग गरेपनि सुर्खेतसम्म जान्छ। सबै ठाउँमा जाँदैन। सुर्खेतबाट क्यारी गर्नैपर्यो। सरकारले जतिसुकै तदारुकता देखाएपनि एकैचोटी पहिलो दिन सबै ठाउँमा त्रिपाल, सबै ठाउँमा म्याट्रेस, सबै ठाउँमा ब्यांकेट पुर्याउन सक्ने स्थितिमा हुँदैनौं,’ उनले भने।
