सरकारले एक सयदेखि ३ सयसम्म बेड भएका सरकारी अस्पतालमा नर्सिङ र पारामेडिक्स पढाउने निर्णय गरेको छ।
बुधबार काठमाडौंमा आयोजित एक कार्यक्रममा बोल्दै स्वास्थ्य तथा जनसंख्यामन्त्री मोहनबहादुर बस्नेतले मन्त्रालयले उक्त निर्णय गरेको जानकारी दिए।
मन्त्री बस्नेतका अनुसार नेपालमा पढ्न नसक्ने र बाहिर पनि जान नसक्नेहरूलाई मध्यनजर गर्दै नेपालमै चिकित्सा शिक्षा अध्ययनका लागि सो नीतिगत निर्णय लिइएको हो।
'सरकारी अस्पतालहरू जहाँ एक सयदेखि ३ सय बेडसम्म चलेको छ, ती अस्पतालहरूलाई आजै चिठी लेखेर राय मागिसक्यौं। चाहे त्यो संघीय, प्रादेशिक वा स्थानीयले सञ्चालन गरेको अस्पताल नै किन नहोस्। त्यसमा हामीले पारामेडिक्स र नर्सिङ पढ्नका लागि खुला गर्ने,’ उनले भने।
प्रधानमन्त्री पुष्पकमल दाहाल र सम्बन्धित निकायसँग पटकपटक छलफल गरेपछि आफूले सो नीतिगत निर्णय लिएको उनको भनाइ छ।
‘बाहिर जान नसक्ने, यहाँ पढ्न नसक्ने अवस्था भएपछि हाम्रा भाइबहिनीहरू डिप्रेशनको शिकार हुन थाले,' उनले भने, 'डिप्रेशन भयो भनेर आउने क्रम बढेपछि नीतिगत निर्णय लिन क्याबिनेटमा प्रस्ताव लगेको थिएँ। सम्बन्धित निकायमा छलफल गरेपछि अहिले प्रक्रिया अघि बढेको छ। जसमा केही सुधारका काम हुने छ।'
यसरी सरकारी अस्पतालहरूमा पढाउने डाक्टर, नर्सहरू र इक्विपमेन्टहरू केही थप्नुपर्ने हुनसक्ने उनले बताए। ठूलो लगानी बिना नै यस्तो काम गर्न सकिने भएपनि सम्बन्धित निकायले निर्णय नगरेको उनको भनाइ छ।
‘हामीले यसो अध्ययन गर्दा सरकारी अस्पतालमा पढाउनका लागि डाक्टर, नर्सिङहरूको कमी हुँदैन। इक्विपमेन्टहरू त्यहाँ हुन्छन् नै। थोरै केही थप्नु पर्ला। र, कहीँकहीँ त पढाउनका लागि हलहरू पनि पुग्छ। कतिपय ठाउँमा थप टहरा बनाउनुपर्ने स्थिति आउला। कुनैपनि ठूलो लगानी नगरीकन सरकारी अस्पतालहरूले यो काम गर्न खोजिपनि रहेको, तर नदिएर बसेको अवस्था थियो। त्यो हामीले निर्णय गर्यौं। यसबाट नेपालको मेडिकल शिक्षामा एउटा क्रान्तिकारी कदम हुन्छ,’ उनले भने।
(न्युज एजेन्सी नेपाल)
