जाजरकोटमा भूकम्प पीडितहरूका लागि अस्थायी टहरा निर्माण गरिरहेका नेपाली कांग्रेसका केन्द्रीय सदस्य प्रदीप पौडेलले चिसोबाट नागरिकलाई बचाउन प्रधानमन्त्रीलाई अपिल गरेका छन्।
कांग्रेसले भूकम्पपीडितका लागि एक हजार वटा अस्थायी टहरा बनाउने निर्णय गरेअनुसार पौडेल नेतृत्वको पहिलो टोली केही दिनदेखि जाजरकोटका विभिन्न ठाउँमा टहरा निर्माणमा श्रमदान गरिरहेका छन्।
‘हामी जाजरकोटमा छौं। यहाँको अवस्था अत्यन्तै नाजुक छ। अधिकांश घर क्षतविक्षत छन्। चिसो बढ्दै गएको छ। बिरामी, सुत्केरी, बालबालिका र वृद्धवृद्धाको स्वास्थ्य अवस्था झनै जटिल बन्दै गएको छ,’ प्रधानमन्त्री पुष्पकमल दाहाललाई अपिल गर्दै बिहीबार पौडेलले भनेका छन्, ‘धेरैजसो परिवार सँग न्यानो लत्ताकपडा समेत छैन। यहाँका नागरिकलाई चिसोबाट जोगाउन तुरुन्तै अस्थायी टहरा निर्माण गरेर सुरक्षित स्थानमा स्थानान्तरण गर्नुपर्छ। होइन भने पुसको ठण्डीमा जीवन रक्षा गर्न सकिँदैन।’
सरकारले भूकम्पबाट प्रभावित नागरिकलाई तत्काल ५० हजार रुपैयाँ दिने घोषणा गरे पनि उक्त रकम नपुगेको बताए।
‘घोषणा गरेको सहयोग रकम अझैसम्म पनि भूकम्प पीडित जनताको हातमा पर्न सकेको छैन। यहाँको स्थानीय प्रशासनबाट प्राप्त जानकारीअनुसार उक्त सहयोग रकम हस्तान्तरण गर्न अझै दुई हप्ता लाग्ने भनिएको छ,’ उनले भने, ‘एक त सहयोगका लागि धेरै नै ढिला भइसकेको छ भने अर्कोतिर अझै दुई हप्ता लाग्ने विषयले सरकारको ध्यान आफ्ना नागरिकमा भन्दा धरै सत्ता लिप्सामा देखिन्छ।’
उनले मंसिर ७ काे चटारोले सरकारलाई भ्याइनभ्याइ भए पनि थोरै समय निकालेर नागरिकको जीवन रक्षा गर्न अपिल गरेका छन्। ‘यस विषयलाई पहिलो प्राथमिकतामा राखेर अत्यन्तै गम्भीरतापूर्वक आवश्यक कदम चाल्न सरकारलाई सचेतसमेत गराउँछु,’ उनले भने।
कांग्रेसले भूकम्पपीडितका टहरा बनाउन इन्जिनियर, डकर्मीसहितको स्वयमसेवक टोली परिचालन गरेको छ।
टहरो निर्माणमा श्रमदान गर्न पुगेका कांग्रेस नेता सुशील भट्टले केही भूकम्प पीडितहरूले अझैसम्म पनि त्रिपाल नपाएको बताए। ‘कुनै परिवारले त अहिलेसम्म पनि त्रिपाल पाउनु भएको रहेनछ, न्यानो लुगा पनि रहेनछ,’ उनले भने, ‘सरकारले भूकम्पपीडितका समस्या तत्काल समाधान गर्नुपर्छ।’
कांग्रेसको स्वयमसेवक टोलीले जाजरकोटको नलगाड नगरपालिका वडा नम्बर ४ र ५ मा टहरा निर्माण गरिरहेका छन्।
तस्बिरहरू:
